Monǵolııada Qazaqstan Respýblıkasynyń Táýelsizdik kúnine arnalǵan is-shara ótti
ASTANA. 10 jeltoqsan. QazAqparat. Qazaqstannyń Monǵolııadaǵy Elshiligi Qazaqstan Respýblıkasynyń Táýelsizdik kúni merekesine oraı 8 jeltoqsanda Ulan-Batyr qalasyndaǵy bedeldi «Shyńǵys han» qonaqúıiniń «Han» zalynda saltanatty qabyldaý ótkizdi,
dep habarlady QR Monǵolııadaǵy Elshiliginen.
Іs-sharaǵa Monǵolııanyń Uly Memlekettik Huralynyń depýtattary, ortalyq atqarýshy organdardyń basshylary, jergilikti iskerler, zııaly qaýym, Monǵolııada tirkelgen dıplomatııalyq korpýs, halyqaralyq uıymdar jáne aldyńǵy qatarly buqaralyq aqparat quraldarynyń ókilderi qatysty (barlyǵy 250-den astam adam).
Qabyldaýdyń monǵol tarapynyń bas qonaǵy, Monǵolııanyń Parlamenti Spıkeriniń orynbasary Gavaagıın Bathýý óz sózinde qazirgi tańdaǵy Qazaqstan-Monǵolııa qatynastary jańa joǵary damý satysyna kóterilgenin aıta kele, bıylǵy 1-2 jeltoqsanda ózi qatysqan Astanada ótken EQYU Sammıtiniń jumysyn joǵary baǵalap, qabyldanǵan sheshimderge rızashylyǵyn bildirdi.
Sonymen birge, Táýelsizdik kúnine arnalǵan qabyldaýǵa atalmysh eldiń eks-prezıdenti Nambaryn Enhbaıar (2005-2009 j.j.) qatysyp, qurmet kórsetti.
Jınalǵan qonaqtar Qazaqstannyń qol jetkizgen jetistikteri týraly derekti fılm, EQYU Sammıti, 2011 jyly Astana men Almatyda ótetin qysqy Azııa oıyndary týraly beıne rolıkterdi tamashalady. Osyǵan qosa, is-sharada qazaq ulttyq qolóner buıymdarynyń kórmesi men EQYU Sammıti taqyrybyna arnalǵan fotokórme uıymdastyryldy.
Qazaqstan Respýblıkasynyń Prezıdenti N.Á.Nazarbaevtyń monǵol tiline aýdarylǵan «Qazaqstandyq jol» men «Eýrazııa júreginde» kitaptary taratylyp, Elbasymyzdyń 2010 jylǵy halqyna Joldaýynyń negizgi qaǵıdalary týraly túsiniktemeler berildi.
Qatysýshylar jýrnalıstterge bergen suhbattarynda osy uıymdastyrylǵan is-sharanyń eki baýyrlas eldiń arasyndaǵy dostastyq, saıası-áleýmettik jáne saýda-ekonomıkalyq qatynastardyń qarqyndy, nátıjeli damýyna úlken yqpal etetindigin basa aıtty.
Atalǵan is-shara eldiń buqaralyq aqparat quraldarynda keńinen jarııa etilip, 12 jeltoqsanda Monǵolııanyń barlyq aýmaǵyna taraıtyn «MNB» ulttyq telearnasynda Qazaqstannyń Táýelsizdik kúnine arnalǵan baǵdarlama kórsetiledi.
