Mońǵolııada Qazaqstan dostary klýbynyń otyrysy ótti
Jıynǵa belgili qoǵam qaıratkerleri - saıasatkerler, ǵylymı zııaly qaýym men qazaq dıasporasynyń ókilderi, sarapshylar, jazýshylar men Mońǵolııanyń bedeldi tulǵalary qatysty.
«Qazaqstan dostary klýbynyń maqsaty – Mońǵolııa azamattarynyń arasynan Qazaqstanǵa qyzyǵýshylyq tanytqan bastamashyl azamattardy biriktirý jáne mońǵol halqyna qazirgi Qazaqstannyń damý baǵdary jóninde senimdi aqparatty jetkizýmen qatar kóshpeli halyqtar arasyndaǵy ekijaqty qarym-qatynastardy nyǵaıtý úshin birlesken is-sharalar uıymdastyrý», delingen habarlamada.
Іs-sharany ashqan Qazaqstan Elshisi Jalǵas Ádilbaev Qazaqstannyń Táýelsizdiktiń 30 jyly ishinde qol jetkizgen jetistikterin, ekonomıkalyq progresti, qoǵamdyq damýdy, halyqaralyq qaýipsizdik arhıtektýrasyndaǵy belsendi rólin atap ótti.
Sonymen qatar, qazaqstandyq dıplomat klýb múshelerine elimizdiń turaqty damýy men halqymyzdyń ál-aýqatyn qamtamasyz etýge baǵyttalǵan ekonomıkalyq jáne saıası reformalar týraly habardar etti. Sondaı-aq, memleket basshysy Qasym-Jomart Toqaevtyń «Halyq birligi men júıeli reformalar – el órkendeýiniń berik negizi» atty Qazaqstan halqyna joldaýynyń iske asyrylý barysy jóninde maǵlumat berdi.
J.Ádilbaev Qazaqstan men Mońǵolııa arasyndaǵy senim men qurmettiń joǵary deńgeıin eskere otyryp, ekijaqty qarym-qatynastardy nyǵaıtý ıgiligi úshin ózara múddelerdi ilgeriletý jáne eki memlekettiń qoǵamdary arasyndaǵy dıalogty qalyptastyrý boıynsha kúsh-jigerdi biriktirý qajettiligin atap ótti. Osylaısha, Elshi ǵylymı, mádenı, ádebı jáne basqa da jobalardy iske asyrý nátıjesinde Qazaqstan men Mońǵolııa halyqtary arasyndaǵy yntymaqtastyqty nyǵaıta otyryp, Dostar klýby «altyn kópir» qyzmetin atqara alady degen senim bildirdi.
Іs-sharada Mońǵolııanyń III Prezıdenti Nambar Enhbaıar (Eńkibaıyr-avt) sóz sóılep, Qazaqstannyń Tuńǵysh Prezıdenti Nursulan Nazarbaevtyń bolashaqqa baǵyttalǵan kóregen saıasatynyń arqasynda Qazaqstannyń qarqyndy ekonomıkalyq damýǵa, eldiń órkendeýine jáne álemdik qoǵamdastyqqa tanylýyna qol jetkizgenin aıtty. Sonymen qatar, N.Enhbaıar elimizdiń qazirgi Prezıdenti Q.Toqaev óziniń áriptesi tańdaǵan baǵytyn dáıekti túrde jalǵastyrýda ekenin, Qazaqstandy álemdik ekonomıkaǵa ilgeriletý úshin sabaqtastyqty qamtamasyz etýmen qatar júıeli reformalar júrgizip otyrǵanyn erekshe atap ótti.
Mońǵol saıasatkeri kólik, logıstıka jáne taý-ken ónerkásibi salalaryndaǵy iri jobalardy júzege asyrý arqyly Qazaqstan men Mońǵolııa arasyndaǵy saýda-ekonomıkalyq yntymaqtastyqty damytý qajettiliginiń ózektiligimen kelisti.
Budan basqa, is-shara barysynda respýblıkamyzdyń serpindi ózgeristerin, egemendi el retindegi tarıhı damý jolyn, sondaı-aq Qazaqstannyń halyqaralyq sahnadaǵy tabystaryn kórkemdeıtin Qazaqstan Táýelsizdiginiń 30 jyldyǵyna arnalǵan foto jáne kitap kórmesi uıymdastyryldy.
Іs-sharanyń sońynda Qazaqstan dostary klýbynyń keleshegi, sondaı-aq shyǵarmashylyq keshter, kórmeler men semınarlar uıymdastyrý arqyly birlesken jobalardy iske asyrý múmkindikteri týraly pikir almasý boldy. Іs-sharaǵa qatysýshylar Qazaqstannyń dostar klýbynyń otyrystaryn turaqty negizde ótkizý týraly biraýyzdan ustanymdaryn bildirip, Qazaqstan men Mońǵolııanyń dostyq qarym-qatynastarynyń ıgiligi úshin jumys isteýge daıyn ekendikterin rastady.
