Mońǵolııada boran kezinde malshylar qaza tapty
Mońǵolııa bıligi alapat qarly borannan qaza bolǵandardyń otbasylaryna qarjylaı kómek kórsetedi. Bul týraly búgin Mońǵolııanyń Tótenshe jaǵdaılar mınıstrligi memlekettik komıssııasynyń hatshysy Tývshınsaıhany Baıarhýý málim etti.
Kazinform agenttigi bul týraly Sınhýa aqparat agenttigine silteme jasap habarlaıdy.
Onyń aıtýynsha, ótken demalys kúnderi kúshti qarly boran saldarynan Mońǵolııa jeriniń 60 paıyzǵa jýyǵyn qar basyp qalǵan.
«Іzdeý-qutqarý operatsııasynyń arqasynda biz jappaı qarly boran kezinde iz-túzsiz joǵalyp ketken 38 adamdy qutqara aldyq. Alaıda qatty boran kezinde tońyp qalǵan mońǵoldyq segiz kóshpeli malshy óli kúıinde tabyldy», - dedi ol.
T.Baıarhýý sonymen qatar qazirgi ýaqytta eldiń Tótenshe jaǵdaılar jónindegi bas basqarmasy tabıǵı apattyń saldaryn joıý boıynsha barlyq qajetti sharalardy jalǵastyryp jatqanyn atap ótti.
«Mońǵolııanyń Tótenshe jaǵdaılar jónindegi memlekettik komıssııasy qaıtys bolǵan kóshpeli malshylardyń otbasylaryna 5 mln mońǵol týgrıgi (1450 dollardan astam) bólinetinin habarlady», - dep qosty ol.
6 qarashada Mońǵolııanyń Týv jáne Ývýrhangaı aımaqtarynda kúshti qarly boran saldarynan segiz kóshpeli malshy qaza bolǵan. Olardyń arasynda 11 jasar bala bar.
