Mońǵolııada qarjylyq esep tapsyrmaǵan alty partııany áreketsiz dep taný usynyldy
ASTANA. KAZINFORM — Mońǵolııanyń Ortalyq saılaý komıssııasy búgingi otyrysynda qarjylyq esepterin usynbaǵan alty saıası partııany áreketsiz dep taný týraly usynysty Joǵarǵy sotqa engizý jóninde sheshim qabyldady.
Mundaı sheshim atalǵan partııalardyń qatarynan eki jyl boıy qarjylyq esepterin tapsyrmaǵanyna baılanysty qabyldandy.
Saıası partııalar «Saıası partııalar týraly» zańǵa sáıkes ár jyldyń 20 shildesine deıin jartyjyldyq qarjylyq esepterin, al kelesi jyldyń 10 aqpanyna deıin jyldyq qarjylyq esepti usynýǵa mindetti.
Qarjylyq esepti Ortalyq saılaý komıssııasyna tapsyrmaǵan jaǵdaıda «Saıası partııalar týraly» zańnyń jańa redaktsııasynyń 21-babynyń 21.1.2-tarmaǵynyń erejeleri qoldanylady.
2025 jáne 2026 jyldary Joǵarǵy sotta tirkelgen 37 partııanyń ishinde Mońǵolııanyń Lıberaldyq partııasy, Mońǵolııa áıelderiniń birikken ulttyq partııasy, Búkil Mońǵolııa eńbek partııasy, Mońǵolııa jańarý partııasy, Ádep partııasy jáne Demokratııalyq reformalar partııasy Ortalyq saılaý komıssııasyna qarjylyq esepterin usynbaǵan.
2025 jyly Ortalyq saılaý komıssııasynyń Saıası partııalardy qarjylandyrý jáne baqylaý departamenti partııalarǵa 15 resmı hat joldasa, 2026 jyly zań talaptaryna sáıkes qarjylyq esepterdi ýaqytyly tapsyrý týraly usynymdar men túsindirýler qamtylǵan bir resmı hat jibergen.
Budan buryn habarlanǵandaı, Mońǵolııa azamattary endi AQSh vızasyn alý úshin kepildik tóleýge mindetti.
