Mońǵolııada halyqtyń 60%-y vaktsına aldy

ULANBATYR. QazAqparat-MONTsAME – Mońǵolııada jappaı vaktsınalaý 23 aqpanda bastaldy. Búgingi kúngi jaǵdaı boıynsha halyqtyń 60%-y ekpe alǵan, dep habarlaıdy QazAqparat MONTsAME-ge silteme jasap.

Vaktsınanyń birinshi dozasyn 2 155 040 adam (66,2%) saldyrsa, ekinshi dozasyn 1 956 183 adam (60,1%) saldyrǵan.

El astanasynda 1 069 783 adam ıaǵnı 18 jastan asqan halyqtyń 99,4 paıyzy vaktsınanyń birinshi dozasyn ektirse, 975 166 adam (90,6%) tolyǵymen vaktsınalanǵan. Sondaı-aq ulttyq deńgeıde 16-17 jastaǵy 60 900 eresek bala, 12-15 jastaǵy 131 649 jasóspirim, 5 154 júkti kelinshek jáne 3 393 bala emizetin ana vaktsınalanǵan.

Jergilikti deńgeıde búgingi kúnde Ómnógov aımaǵy kósh bastap tur, odan keıingi oryndarda Govsúmber men Súhbaatar aımaqtary tur. Al eń tómen vaktsınatsııa kórsetkishteri Dýndgov, Óvórhangaı, Hóvsgól aımaqtarynda.

2021 jyldyń aqpan aıynan beri Mońǵolııaǵa vaktsınanyń AstraZeneca, Pfizer/BioNTech, Spýtnık V jáne Sinopharm sııaqty tórt túrinen 5,3 mıllıon doza kelip tústi.

Mońǵolııa úkimeti 10 tamyzǵa qaraı Ulanbatyr turǵyndaryn, al 20 tamyzǵa qaraı óńirlerdiń turǵyndaryn tolyǵymen vaktsınalaýdy josparlap otyr.