Mońǵolııada halyqaralyq Power Expo & Festival 2026 festıvali ótedi
ASTANA. KAZINFORM — Power Expo & Festival 2026 halyqaralyq festıvaliniń 14-maýsymy Ulanbatyr qalasynda ótedi, dep habarlaıdy Montsame.
Mońǵolııa úkimeti 2023–2028 jyldardy «Mońǵolııaǵa saıahat etý jyldary» dep jarııalap, eldi halyqaralyq deńgeıde tanytý maqsatynda týrızm, mádenıet jáne sport salalarynda túrli is-sharalardy júzege asyryp keledi.
Osy aıada ekstremaldy sport túrlerine arnalǵan 14-shi halyqaralyq Power Expo & Festival 2026 festıvali 8–10 mamyr aralyǵynda Ulanbatyr qalasynyń batys bóliginde ornalasqan Power Land avtosaýda kesheninde uıymdastyrylady.
Atalǵan festıval 2026 jyldyń qańtarynda Bangkok qalasynda ótken Asian Motor Awards marapattaý rásiminde Mońǵolııaǵa alǵash ret «Azııadaǵy avtosport salasyndaǵy úzdik shara» syılyǵyn alyp bergen bolatyn.
14-shi Power Expo & Festival festıvaline 10 eldiń komandalary men sportshylary qatysady. Sonymen qatar, bıylǵy baǵdarlama keńeıtilip, «Racing TOP Model Asia» halyqaralyq jarys modelderi baıqaýy ótedi. Baıqaý aıasynda 3–5 sheteldik elden kelgen kásibı modelder mońǵolııalyq qatysýshylarmen bir sahnada baq synaıdy.
Festıval baǵdarlamasynda halyqaralyq drıft-shoý, avtokólik sherýi, aralas battldar, avtokólik kórme-jármeńkesi, avtobýs júrgizý jarystary jáne ekstremaldy qoıylymdardy qosa alǵanda, 16 túrli jarys pen shoý uıymdastyrý josparlanǵan.
Budan buryn Mońǵolııa úkimeti ekonomıkalyq forýmdy ótkizýdi keıinge qaldyrǵanyn jazdyq.
