Mońǵolııada FIFA qoldaýymen jańa stadıon salynbaq
ASTANA. KAZINFORM — Mońǵolııada halyqaralyq jarystar ótetin jańa stadıon salynady, dep habarlaıdy Montsame.
Mońǵolııa Úkimeti men Halyqaralyq fýtbol federatsııasy (FIFA) elde halyqaralyq standarttarǵa saı fýtbol stadıonyn salý boıynsha yntymaqtastyq týraly memorandýmǵa qol qoıdy.
Memorandýmǵa Mońǵolııanyń Mádenıet, sport, týrızm jáne jastar máseleleri mınıstri Jýkovyn Aldarjavhlan, FIFA-nyń múshe qaýymdastyqtarmen jumys jónindegi bas dırektory Elhan Mamedov jáne Mońǵolııa fýtbol federatsııasynyń prezıdenti Ts.Anandbazar qol qoıdy. Qujatqa qol qoıý rásimine Mońǵolııanyń Premer-mınıstri N.Ýchral men FIFA prezıdenti Djannı Infantıno qatysty.
— Memorandým aıasynda FIFA stadıondy jobalaý jáne salý jumystaryna tehnıkalyq keńes berip, kásibı qoldaý kórsetedi. Al Mońǵolııa Úkimeti jobany qoldanystaǵy zańnamaǵa sáıkes qoldaýǵa mindettenedi, — delingen habarlamada.
Yntymaqtastyq Mońǵolııada fýtboldy damytýǵa, balalar men jastardy qoldaýǵa, sondaı-aq bolashaqta el aýmaǵynda halyqaralyq jarystar men týrnırler ótkizýge múmkindik jasaýǵa baǵyttalǵan.
Osydan buryn Qazaqstan men Mońǵolııa saýda aınalymyn bes ese ulǵaıtýdy kózdep otyrǵanyn jazǵan bolatynbyz.
