Mońǵolııada deportatsııalanǵan shetel azamattarynyń sany 28%-ǵa artty
ASTANA. KAZINFORM — Shetel azamattary men azamattyǵy joq adamdar isteri jónindegi departamenttiń málimetinshe, bıylǵy jyldyń birinshi toqsanynda elden deportatsııalanǵan sheteldikter sany 2025 jyldyń osy kezeńimen salystyrǵanda 28,84%-ǵa artqan, dep jazady Montsame.
Atap aıtqanda, 277 shetel azamaty turýǵa ruqsat merzimi aıaqtalǵannan keıin elden shyqpaý, ýákiletti organdardyń ruqsatynsyz jumys isteý, kelý maqsatyna sáıkes kelmeıtin qyzmetpen aınalysý, sondaı-aq ýaqytsha vızanyń merzimin asyrý sebepterimen deportatsııalanǵan.
Sonymen qatar, kelý maqsatyn naqty túsindire almaǵan, sapar maqsatyna sáıkes kelmeıtin vızamen kelgen, elde bolý jáne keri qaıtý úshin jetkilikti qarjy kózderin rastaı almaǵan tulǵalarǵa qatysty da sharalar qabyldanǵan. Vıza merziminiń aıaqtalýyna baılanysty 16 eldiń 235 azamatyna elge kirýge tyıym salyndy.
2026 jyldyń birinshi toqsanynda departament 58 tekserý júrgizip, 200 kásiporyn men uıymdaǵy 1579 shetel azamatyn qamtydy.
Anyqtalǵan quqyq buzýshylyqtar boıynsha 3002 shetel azamaty, 843 shaqyrýshy uıym jáne 12 jeke tulǵa ákimshilik jaýapkershilikke tartylyp, olarǵa Ákimshilik quqyq buzýshylyq týraly zańǵa sáıkes aıyppul salyndy.
Budan bólek, 11 kásiporyn men uıymǵa resmı nusqamalar joldandy.
Osydan buryn Mońǵolııada birinshi toqsanda sheteldik týrıster sany 40%-ǵa artqanyn jazdyq.
