Mońǵolııada dástúrli Naadam merekesi bastaý aldy
ASTANA. KAZINFROM — Mońǵolııa astanasynyń ortalyq stadıonynda Ulttyq Naadam merekesiniń saltanatty ashylý rásimi ótti, dep habarlaıdy Montsame.
Mońǵolııa alǵashqy Mońǵol memleketiniń qurylǵanyna 2235 jyl, Uly Mońǵol ımperııasynyń qurylǵanyna 820 jyl, ulttyq egemendik pen táýelsizdiktiń qalpyna keltirilgenine 115 jyl, Halyq revolıýtsııasynyń jeńisine 105 jyl jáne Demokratııalyq revolıýtsııanyń jeńisine 36 jyl tolýyna arnalǵan «Naadam» ulttyq merekesin atap ótip jatyr.
El astanasynyń ortalyq stadıonynda ótken Naadamnyń resmı ashylý saltanatynda Mońǵolııa prezıdenti Ýhnaagıın Húrelsúh quttyqtaý sóz sóıledi.
Ulttyq merekeniń ashylý rásimine qurmetti qonaq retinde Koreıa Respýblıkasynyń prezıdenti Lı Chje Men jubaıy Kım He Genmen birge qatysty. Koreıa Respýblıkasynyń Prezıdenti Mońǵolııa prezıdenti Ýhnaagıın Húrelsúhtiń shaqyrýymen elge memlekettik saparmen bardy.
Óz sózinde Mońǵolııa prezıdenti arǵy ata-babalar qurǵan Ǵun ımperııasynan bastaý alatyn mońǵoldyń Naadamy memlekettilik dástúrlerin, tarıhı-mádenı murany, mońǵol halqynyń birligi men yntymaǵyn, eldiń táýelsizdigi men órkendeýin aıshyqtaıtyn uly ulttyq ári memlekettik mereke ekenin atap ótti.
— Mońǵol memleketiniń tarıhyndaǵy aıtýly datalarǵa arnalǵan, álemde teńdesi joq Naadam ulttyq merekesimen barsha mońǵol halqyn jáne qadirli qonaqtardy quttyqtaımyn, — dedi memleket basshysy.
Bıylǵy Naadamnyń resmı ashylý rásimine kásibı shyǵarmashylyq ujymdardyń, jeke stýdııalardyń, prodıýserlik kompanııalardyń jáne táýelsiz óner qaıratkerleriniń qatarynan eki myńnan astam adam qatysty.
Merekelik baǵdarlamanyń sharyqtaý shegi 11–13 shilde aralyǵynda Dúnıejúzilik jylqy kúnin merekeleý aıasynda Húı doloon hýdag jerinde ótetin birqatar is-sharalar bolmaq. Bul kún Mońǵolııa prezıdentiniń bastamasymen Birikken Ulttar Uıymy tarapynan bekitilgen. Onyń maqsaty — jylqy sharýashylyǵy mádenıetin, kóshpeli ómir salty men mońǵol halqynyń dástúrlerin saqtaý, sondaı-aq jylqy ósirýmen baılanysty baı murany dáripteý.
Budan buryn Qasym-Jomart Toqaev Ýhnaagıın Hýrelsýhty Naadam ulttyq merekesimen quttyqtaǵanyn jazǵanbyz.
