Mońǵolııada dástúrli kıim men áshekeılerge arnalǵan arnaıy kórme ashyldy
ASTANA. KAZINFORM — Mońǵolııanyń Ulttyq mýzeıinde «Dástúrli mońǵol kıimi men áshekeıleri» atty arnaıy kórme ashyldy. Bul týraly Montsame habarlady.
Mońǵolııanyń Ulttyq mýzeıi ulttyq kıim men áshekeılerdiń tarıhı damýy, evolıýtsııasy jáne transformatsııasyna arnalǵan «Dástúrli mońǵol kıimi men áshekeıleri» atty arnaıy kórmeni ashty.
Kórmede Ulttyq mýzeı qorynan alynǵan 100-den astam eksponat usynylǵan. Olardyń qatarynda áshekeı buıymdar, kıim úlgileri men túrli artefaktiler bar. Ekspozıtsııa ǵylymı-zertteý mátin, sholý, sýretter jáne fotomaterıaldarmen tolyqtyrylǵan.
Eksponattardyń arasynda neolıt dáýirine jatatyn monshaqtar, tas dáýirinde jasalǵan túıequs jumyrtqasynyń qabyǵynan jasalǵan alqalar, sondaı-aq qabannyń azý tisterinen jasalǵan áshekeıler bar. Erekshe nazar aýdarýǵa turarlyq jádigerlerdiń qatarynda Mońǵol ımperııasy kezeńindegi hatýndardyń bas kıimi sanalatyn «altan tsog» altyn áshekeıleri, sondaı-aq XIX ǵasyr men XX ǵasyrdyń basyndaǵy aqsúıekterdiń kıim úlgileri usynylǵan. Bul qundy eksponattar mońǵol halqynyń baı mádenı murasy men tarıhyn aıqyn kórsetedi.
— Kórmede ǵundar, túrikter, uıǵyrlar jáne ortaǵasyrlyq kezeńge tán órnektermen bezendirilgen túrli kıimder men áshekeı buıymdar usynylǵan. Kórmeniń maqsaty — kóshpeli halyqtyń dástúrli kıimi men áshekeıleri tek turmystyq qajettilik úshin ǵana emes, sonymen qatar salt-dástúrdi, dúnıetanymdy, dinı nanymdardy jáne sımvolıkany beınelegenin kórsetý. Bul kórme kelýshilerge ata-babalarymyzdyń kóne zamanda qandaı kıim kıgenin, osy dástúrdiń urpaqtan urpaqqa qalaı jalǵasqanyn kórýge múmkindik beredi ári myńjyldyq mońǵol mádenıeti týraly tereń túsinik qalyptastyrady, — dedi Mońǵolııa Ulttyq mýzeıiniń Ǵylymı-zertteý ortalyǵynyń jetekshisi Ch.Baıandelger.
Kórme 2026 jylǵy 2 aqpanǵa deıin jalǵasady.
Aıta ketelik Mońǵolııa jem-shóp pen unǵa baj salyǵyn ýaqytsha toqtatty.