Mońǵolııada buryn beımálim bolyp kelgen túrki ǵuryptyq kesheni tabyldy

NUR-SULTAN. QazAqparat –Mońǵolııanyń Dýndgov aımaǵy Nogoontal (Jasyl dala) degen jerden buryn beımálim bolyp kelgen túrki ǵuryptyq kesheni tabyldy. Bul týraly Halyqaralyq Túrki akademııasynyń prezıdenti Darhan Qydyráli áleýmettik jelidegi paraqshasynda jazdy, dep habarlaıdy QazAqparat.

«Negizinen buǵan deıin túrki hanzadalary men bekteriniń iri keshenderi Mońǵolııanyń ortalyq aımaǵy Orhon, Týýl ózeni alqabynan tabylyp kelgen edi. Eldiń soltústik tarapyndaǵy Gobı shóli aımaǵynan mundaı eskertkishter asa sırek kezdesetindikten, ony tııanaqty zertteý kóne túrki mádenıeti arealyn keńeıte túsýge múmkindik týdyrady. Bul jádigerlerdi zerttep zerdeleýdiń túrki tarıhyna olja salary anyq», – dep jazdy akademııa basshysy.

Tabylǵan keshenniń aýmaǵy 2.5h2.5 m, sharshy pishindi. Keshende ornalasqan jaıpaq tasattyq tasqa múıiz ben gúl tárizdi oıý-órnekter oımyshtap aıqyn beınelengen.
Ǵuryptyq keshende bıiktigi 2 metrden asatyn 4 dana tik syntas anyqtaldy. Keshen kóne túrki aqsúıek bekzadasynyń tıesili dep joramaldanýda.

Aıta ketý kerek, Túrki akademııasy Mońǵolııanyń Ulttyq mýzeıimen birlesip 2016 jyldan beri «Kerýlen» jobasy aıasynda Hentıı aımaǵy Delgerhaan sumynynda Haıaahýdag, Gúnbúrd túrki keshenderine arheologııalyq qazba júrgizip, kóshpendilerdiń mádenıetine qatysty eleýli jańalyqtar ashqan bolatyn.

Akademııa men Mońǵolııa Ulttyq mýzeıi aldaǵy ýaqytta jańadan tabylǵan nysanda zertteý jasaýdy josparlap otyr.