Mońǵolııada boranda iz-túzsiz joǵalǵan 294 adam qutqaryldy

Mońǵolııada alapat qarly boran kezinde joǵalǵan 294 adam aman tabylyp, qutqaryldy. Bul týraly beısenbide Mońǵolııanyń Tótenshe jaǵdaılar jónindegi Bas basqarmasynan habarlady. Kazinform agenttigi bul týraly Sınhýa aqparat agenttigine silteme jasap habarlaıdy.

«Qazirgi kezde ótken túni kúshti qarly boran bolǵan eldiń Sýhbaatar, Dornod, Hentıı jáne Dornogov aımaqtarynda joǵalǵan 14 adamdy izdeý jumystary júrgizilýde», - delingen resmı habarlamada.

Mońǵolııanyń Meteorologııa jáne qorshaǵan ortaǵa monıtorıng júrgizý ınstıtýtynyń habarlaýynsha, sársenbide eldiń shyǵys aımaqtarynda qatty boran bastaldy. Jel ekpini keı jerlerde 25-30 m/s deıin jetken.

Sınoptıkterdiń boljamynsha, aldaǵy kúnderi eldiń basym bóliginde kún qubylmaly jáne salqyn bolady qar aralas jańbyr jaýyp, jel ekpini kúsheıedi.

Eske sala ketsek, buǵan deıin 6 qarashada Mońǵolııanyń Týv jáne Ývýrganhaı aımaqtarynda qarly boran saldarynan segiz kóshpeli malshy qaza bolǵany týraly habarlaǵan bolatynbyz. Olardyń arasynda 11 jasar bala bar.