Mońǵolııada bolǵan jutqa baılanysty sol eldegi qazaqtardyń jaǵdaıymen aınalysatyn komıssııa qurylady - Kóshi-qon komıteti
ASTANA. Sáýirdiń 15-i. QazAqparat /Qanat Mámetqazyuly/ - Ótken qysta Mońǵolııada oryn alǵan jutqa baılanysty sol eldegi qazaqtardyń jaǵdaıymen aınalysatyn komıssııa qurylady.
Búgin QR Parlamenti Májilisinde «Qazaqstannyń kóshi-qon zańnamasy: jetildirý joldary» taqyrybynda ótken dóńgelek ústel barysynda Eńbek jáne halyqty áleýmettik qorǵaý mınıstrligi Kóshi-qon komıtetiniń tóraǵasy Qabylsaıat Ábishev osylaı málim etti, dep habarlaıdy QazAqparat.
Osydan biraz buryn depýtat Amangeldi Momyshev gýmanıtarlyq apatqa ushyraǵan Mońǵolııadaǵy qazaqtarǵa járdem berý, olardy túgeldeı Otanyna kóshirip ákelý týraly Úkimet basshysynyń atyna saýal joldaǵan bolatyn. Búgingi jıynda bul máselege qatysty áńgime taǵy da kóterilip, depýtattar ondaǵy qazaqtardyń jaǵdaıyna alańdaýshylyq bildirgen bolatyn.
«Depýtattardyń Mońǵolııa qazaqtarynyń jaǵdaıyna qatysty kótergen máselesi boıynsha Úkimetten tapsyrma kelip tústi. Aldaǵy ýaqytta bul ispen aınalysatyn arnaıy komıssııa qurylyp, olar Mońǵolııadaǵy qazaqtar jaǵdaıyn óz kózderimen baryp kóredi», dedi Q. Ábishev.
Onyń aıtýynsha, osy qysta Mońǵolııada oryn alǵan tótenshe juttan eldiń 5 mln.-ǵa tarta maly qyrylsa, bunyń ishinde qazaqtardyń qorasynda qyrylǵan mal basy 450 myńǵa jýyq eken.
Sonymen birge, Komıtet tóraǵasy Mońǵolııa elinen Qazaqstanǵa kóship kelýge nıet bildirgender sany da sonshalyqty kóp emes ekendigin alǵa tartty. Onyń sózine qaraǵanda, Qazaqstanǵa kelýge nıet bildirip, usynys bergen otbasy sany myńǵa jýyq qana.
«Byltyr Mońǵolııadan 670-ke tarta otbasy Qazaqstanǵa kóship keldi. Jalpy, bul elge qatysty aıtar bolsaq, ondaǵy qazaqtardyń basym bóligi Mońǵolııany da otany retinde sanaıdy, ol jaqty da týǵan jeri retinde qımaıdy. Keıbireýleri kóship kelý, ornalasý qıyndyqtarynan qashqaqtaıdy. Maldaryn sol elge kelip, Qazaqstandaǵy naryq boıynsha baǵalap satyp alsa degen ýájder aıtyldy. Jalpy, qolda bar málimetterge súıensek, Mońǵolııadaǵy qazaqtardyń ıeligindegi maldardy adam basyna shaǵyp eseptesek, olardyń árqaısysyna 16 bas maldan keledi eken», dedi Q. Ábishev.
