Mońǵolııada aýsylǵa qarsy alǵashqy otandyq vaktsına qarashada shyǵarylmaq
ASTANA. KAZINFORM — Mońǵolııanyń «Bıokombınat» memlekettik kásiporny aýsylǵa qarsy vaktsınanyń alǵashqy partııasyn qarasha aıyna deıin shyǵarýdy josparlap otyr, dep habarlaıdy Montsame.
Azyq-túlik, aýyl sharýashylyǵy jáne jeńil ónerkásip mınıstri Tsagaanhýýgıın Iderbat «Bıokombınat» kásipornynyń atqarýshy dırektory mindetin atqarýshy B.Bıambasaıhanmen jáne óndiristik-tehnıkalyq bóliminiń basshysy B.Dýlamsúrenmen kezdesti.
Mınıstr kásiporyn jumysyn jandandyrýdy, basqarý júıesin ońtaılandyrýdy jáne el ishinde vaktsına óndirý kólemin arttyrýdy tapsyrdy.
Salalyq vedomstvo janyndaǵy jumys toby Reseı men Qytaıdyń jetekshi zerthanalarymen ózara baılanys ornatqan. Vaktsınanyń alǵashqy partııasyn qarasha aıyna deıin shyǵarý josparlanyp otyr. Al dalalyq synaqtardy osy aıda ótkizý kózdelgen.
«Bıokombınat» kásiporny 1923 jyly qurylǵan. Al 1973 jyly Majarstannyń tehnıkalyq-ekonomıkalyq qoldaýymen kópsalaly óndiristik keshen bolyp qaıta quryldy.
Kásiporyn quramynda tórt bólimshe men 15 tseh bar. Munda 198 adam jumys isteıdi. Kásiporyn janýarlarǵa arnalǵan vaktsınalar men dıagnostıkalyq preparattardy qosa alǵanda, 46 túrli ónim shyǵarady.
Jyl saıyn kásiporynda 135 myń lıtr suıyq vaktsına jáne 31 mln doza lıofılızatsııalanǵan vaktsına óndiriledi.
Osyǵan deıin Mońǵolııada memlekettik kásiporyndar sany 30%-ǵa qysqarǵanyn jazǵanbyz.
