Mońǵolııada apta boıǵy jańbyrdyń sońy qar men boranǵa ulasty
MOŃǴOLIıA. QazAqparat - Birneshe kún buryn ǵana toqtaýsyz jaýǵan jańbyrdan zardap shekken Mońǵolııada qar jaýyp, boran soqty, dep habarlaıdy QazAqparat Asiarussia.ru saıtyna silteme jasap.
Qazir jaz aıynyń qyzǵan shaǵy. Biraq búginde Mońǵolııadaǵy aýa raıyn boljap aıtý qıynǵa soǵyp otyr. Máselen, ótken apta boıy Gobı-altaı aımaǵynyń Chandman somonynda toqtaýsyz jańbyr jaýǵan bolatyn. Al demalys kúni somonda qar jaýyp, boran soqty.
Somon Mońǵolııanyń ońtústik-batysynda, kórshi Baıanhongor aımaǵymen shekarada ornalasqan. Aýmaǵy 4 629 sharshy shaqyrym. Aýa raıy kúrt qubylmaly. Qańtar aıyndaǵy ortasha temperatýra -18-20 gradýs, shildedi +20 gradýs.
Somonnyń ortalyǵy - Tal-shand kenti. Ol el astanasy - Ulanbatyrdan 970 shaqyrym qashyqtyqta ornalasqan.
Eske salaıyq, 18 shilde kúni Baıan-Ólgeı aımaǵynda apta boıy jaýǵan nóser saldarynan sý basqan úılerdiń sany 530-ǵa jetti. Baıan-Ólgeı qazaqtar kóp qonystanǵan aımaq bolyp tabylady.
Montsame agenttiginiń málimetinshe, 530 úıde turatyn 2512 adam balabaqshalar men mektepterdiń ǵımarattaryna ornalastyryldy. Kóptegen otbasylardyń úıleri turýǵa jaramsyz bolyp qaldy.
