Mońǵolııada «Altaı halyqtary» sımpozıýmy ótip jatyr
ULANBATYR. QazAqparat - Mońǵolııa astanasy Ulanbatyr qalasynda VII halyqaralyq «Altaı halyqtary» sımpozýımy jumysyn bastady. 10 tamyzǵa deıin jalǵasatyn jıyn Altaıdan taraǵan halyqtardyń tarıhy men mádenıeti, tili men salt-sanasyna qatysty máselelerdi ǵylymı turǵyda talqylaýdy kózdeıdi, dep habarlaıdy Túrki Akademııasynyń baspasóz qyzmeti.
«Altaı halyqtary» sımpozıýmy altaıstıka salasynyń damý baǵyttaryn pysyqtaýǵa, ǵylymnyń osynaý salasyn zertteýmen aınalysyp júrgen túrli qurylymdar men ǵalymdardyń basyn qosýdy da kózdeıdi. Sonymen birge, aldaǵy ýaqytta atqarylýy tıis jumystardy pysyqtaý maqsatyn da qoıypty. Jıynnyń ashylý saltanatynda sóz alǵan Mońǵolııa ulttyq ǵylym akademııasynyń prezıdenti Dúgerıın Regdel myrza altaıstıka baǵytynda Qazaqstannyń atqaryp jatqan jumystaryna joǵary baǵa berdi. Sonyń ishinde, Astanada ornalasqan Halyqaralyq Túrki akademııasynyń bul baǵyttaǵy qyzmetin aıyryqsha atap ótti.
Al, Halyqaralyq Túrki akademııasynyń prezıdenti Darhan Qydyráli sımpozıým barysynda Akademııanyń altaıstıka jáne mońǵolıstıka baǵyttarynda atqaryp jatqan jumystaryna toqtaldy. Halyqaralyq uıym Mońǵolııa ǵalymdarymen birlese zertteý júrgizýdi tórt jyl buryn bastaǵan. Olardyń alǵashqylary aıaqtalyp ta keledi. Qazirgi tańda TWESCO men Mońǵolııanyń ulttyq ǵylym akademııasy birlese júrgizip jatqan birneshe arheologııalyq qazba jumystary bar. Atap aıtqanda, bıyl Mońǵolııadaǵy Shıvet ýlaan keshenindegi qazba jumystary aıaqtalady. Sıpozıým barysynda akademııa basshysy qazba jumystarynyń barysy týraly aıtyp, qol jetken nátıjeler jaıly baıandady.
