Mońǵolııada alǵash ret «Sút festıvali — 2025» ótedi

ASTANA. KAZINFORM — Jyl saıyn 1 maýsymda búkil álemde Dúnıejúzilik sút kúni toılanady, dep habarlaıdy Montsame.

Súttiń, sút ónimderiniń paıdasy men sút ónerkásibiniń mańyzdylyǵy týraly qoǵamnyń habardarlyǵyn arttyrý maqsatynda Mońǵolııa tarıhynda alǵash ret «Sút festıvali — 2025» («Milk Festival 2025») uıymdastyrylady.

Dúnıejúzilik sút kúni alǵash ret 2001 jyly BUU-nyń Azyq-túlik jáne aýyl sharýashylyǵy uıymynyń (FAO) bastamasymen ótkizilgen. Buǵan deıin bul kún Mońǵolııada tek sút ónerkásibi qyzmetkerleriniń arasynda atap ótiletin. Bıyl bul mereke keń kólemde uıymdastyrylmaq.

«Súú», «Adý Deırı», «Teso fýýd», «Vıtafıt mılk» jáne «Monfresh» sekildi iri ulttyq sút jáne sút ónimderin óndirýshi kompanııalar Mońǵolııanyń Azyq-túlik, aýyl sharýashylyǵy jáne jeńil ónerkásip mınıstrligimen, FAO jáne Mońǵolııanyń sút ónerkásibi federatsııasymen birlese otyryp, el astanasynyń Ulttyq parkinde halyq úshin Ashyq esik kúnin ótkizedi.

Festıvaldiń maqsaty — ásirese bolashaq urpaq sanalatyn balalar arasynda sút pen sút ónimderiniń mańyzyn nasıhattap, olardy kúndelikti ómirdiń bir bóligine aınaldyrý.

Festıval barysynda iri ulttyq kompanııalar sút ónimderimen tanystyryp, balalarǵa syılyqtar taratady jáne dám tatýlar uıymdastyrady. Sonymen qatar balalarǵa arnalǵan kórkem jáne mádenı is-sharalar, túrli oıyndar, «Kospleı» baıqaýy, teatrlyq jáne tsırktik qoıylymdar ótedi.

Aıta ketsek, Dúnıejúzilik sút kúni Mońǵolııada alǵash ret 2016 jyly atap ótilgen bolatyn.

Budan buryn Mońǵolııada alǵash ret «Altyn qaıshy – 2025» atty qoı qyrqý boıynsha halyqaralyq baıqaý ótetini málim boldy.