Mońǵolııada 7 mln-nan astam bas mal qyryldy
ASTANA. KAZINFORM – Mońǵolııada barlyǵy 7,1 mln mal qyrylyp, 5,6 mln maldyń óleksesi joıylyp, kómilgen. Bul týraly eldiń Tótenshe jaǵdaılar jónindegi bas basqarmasy habarlady.
«Aq jáne temir jut (qysqy taqyrshylyq) kezinde qyrylǵan irili-usaqty mal ólekselerin joıý jáne kómý boıynsha 15 sáýirde bastalǵan jumystarǵa zoonozdy juqpany zertteý ortalyqtarynyń qyzmetkerleri, sondaı-aq Mońǵolııada maldyń qyrylýynyń eń joǵary kórsetkishi tirkelgen aımaqtardaǵy kóshpeli malshylardyń ózderi tartyldy», - dep keltirdi Sınhýa aqparat agenttigi Mońǵolııa tótenshe jaǵdaılar vedomstvosynyń resmı málimdemesin.
Mońǵolııanyń Azyq-túlik, aýyl sharýashylyǵy jáne jeńil ónerkásip mınıstrliginiń málimetinshe, 2023 jyldyń sońyna qaraı eldegi maldyń jalpy sany 64,7 mln basty qurady.
