Mońǵolııada 36,1 myń sheteldik azamat jumys isteıdi
ASTANA. KAZINFORM — Bıylǵy jyldyń úshinshi toqsanynyń qorytyndysy boıynsha Mońǵolııada 114 elden kelgen 36,1 myń sheteldik azamat eńbek etken, dep habarlaıdy Montsame.
Olar eńbek sharty negizinde jalaqy nemese ózge de tabys taýyp, sondaı-aq volonterlik qyzmetpen aınalysady.
Ulttyq statıstıka komıtetiniń málimetinshe, elde jumys isteıtin sheteldikter sany ótken jyldyń sáıkes kezeńimen salystyrǵanda 51,5%-ǵa (12,3 myń adam), al aldyńǵy toqsanmen salystyrǵanda 19,8%-ǵa (6 myń adam) ósken.
Eńbek sharty boıynsha jumys isteıtin sheteldikterdiń 92,8%-y nemese 33,5 myńy — erler, al 7,2%-y nemese 2,6 myńy — áıelder. Jas ereksheligi boıynsha eń úlken topty 35–39 jastaǵy azamattar quraıdy. Olardyń sany — 6,4 myń adam. Al 20 jasqa tolmaǵandar sany eń az — 305 adam.
Sonymen qatar úshinshi toqsanda jumysqa ornalastyrý qyzmetteriniń kómegimen 111 adam shetelge aqyly jumysqa jiberilgen. Bul ótken jyldyń sáıkes kezeńimen salystyrǵanda 46,1%-ǵa (95 adamǵa) az, al aldyńǵy toqsanmen salystyrǵanda 18,1%-ǵa (17 adamǵa) kóp.
Budan buryn Mońǵolııada memlekettik kásiporyndar sany 30%-ǵa qysqarǵanyn jazǵanbyz.
