Mońǵolııada 3333 oqýshy bir mezette «Táýelsizdik» atty óleńdi oqydy
ASTANA. KAZINFORM — El astanasynyń basty alańynda Mońǵolııanyń geografııalyq kartasy túrinde sap túzegen 3333 oqýshy «Týsgaar togtnol» (Táýelsizdik) óleńin hormen oqydy, dep habarlaıdy Montsame.
Óleńniń avtory — Mońǵolııanyń halyq jazýshysy, Eńbek eri Dendevıın Pýrevdorja.
2016 jyly Ulan-Batyr qalasynda «Oıýýny Ýndraa» orta mektebiniń 3333 oqýshysy alǵash ret bul óleńdi Sýhbaatar alańynda oqydy. Sodan beri jyl saıyn sáýir aıynyń birinshi aptasynda orta mektep oqýshylary otansúıgishtik jáne táýelsizdik ıdeıalaryn poezııa arqyly jetkizedi.
Bıylǵy jyly «Oıýýn Ýndra» mektebi «Táýelsizdik 3333» baǵdarlamasyn búkil elge nasıhattaý mindetin qoıdy. Sonyń nátıjesinde bir ýaqytta 21 aımaqtyń ortalyq alańdarynda óleń joldary oqyldy.
«Oıýýn Ýndra» mektebiniń dırektory S. Nergýıdavaa atap ótkendeı, bul óleń mońǵol murasyn, mádenıetin, ana tili men jerin beıneleıdi.
— Іs-sharanyń maqsaty — el táýelsizdigi men bostandyǵynyń qundylyǵy men mánin jetkizý, ótkenniń, qazirgi jáne bolashaq urpaqtyń rýhanı birligin qamtamasyz etý, otansúıgishtikke tárbıeleý jáne bolashaq urpaq úshin ana tili mádenıetin saqtaý, — deıdi ol.
Sonymen qatar mekteptiń 6-synyp oqýshysy «Táýelsizdik» óleńin oqyǵannan keıingi áserimen bólisti.
— Men «Táýelsizdik» óleńin oqı otyryp, óz elimniń murasyn nasıhattaǵanyma óte qýanyshtymyn. Óleńdi ekinshi synypta jattadym. Kishkentaı kezimde ony oqyp, maǵynasyn túsiný qıynǵa soqty, biraq qazir men ony tereńirek túsindim. Bul óte ádemi óleń, — dep atap ótti Amınhýslen.
Buǵan deıin Mońǵolııada 2026 jyl bilim berýdi qoldaý jyly dep jarııalanǵanyn jazdyq.