Mońǵolııada 12 eldiń tsırk ártisteri bas qosady

ASTANA. KAZINFORM — Mońǵolııada tsırk shoýyna qatysý úshin ártúrli elderdiń ártisteri jınalady, dep habarlaıdy Montsame.

Mońǵol kórermenderine alǵash ret 2012 jyly usynylǵan «Álem tsırki Mońǵolııada» halyqaralyq tsırk qoıylymy 2026 jyly jańa baǵdarlamamen kórermenge jol tartpaq.

18 sáýirde «ASA» arenasynda bastalatyn shoýǵa Mońǵolııa, Izraıl, Ýkraına, Qazaqstan, Reseı, Qytaı, Portýgalııa, Chehııa, Italııa, Kolýmbııa jáne Meksıkadan kelgen shamamen 280 ártis qatysady.

Bıylǵy erekshelik – tsırk qoıylymy alǵash ret Darhan-Ýýl aımaǵynda da ótedi.

Qoıylymnyń bas prodıýseri N. Erdeneniń aıtýynsha, baǵdarlama tolyq daıyn.

— Qatysýshylar men janýarlar elge jetkizilgen. Máselen, jolbarystar Reseı men Qazaqstandaǵy gastrolderin aıaqtap, Mońǵolııaǵa deıin 4000 shaqyrym jol júrip kelgen. Bir jolbarys kúnine shamamen 5 keli et jeıtindikten, olar úshin 3,3 tonna sıyr eti daıyndalǵan. Kórermender jyl saıyn jańa dúnıeni kútedi. Biz sol úmitti aqtaýǵa tyrysamyz. Eń bastysy – halyqaralyq tsırk baıqaýlarynda júlde alǵan úzdik nómirlerdi jınadyq, — dedi ol.

Osyǵan deıin habarlanǵandaı, Qazaqstannyń tsırk ártisteri halyqaralyq festıvaldiń jeńimpazy atandy.