Mońǵolııa jem-shóp pen unǵa baj salyǵyn ýaqytsha toqtatty
ASTANA. KAZINFORM — Mońǵolııa Parlamenti jem-shóp pen un ımportyna salynatyn kedendik bajdardy alyp tastaıtyn qarardy maquldady. Bul týraly Montsame habarlady.
11 jeltoqsanda Mońǵolııanyń Joǵarǵy Memlekettik Hýralynyń (Parlamentiniń) jalpy otyrysynda «Qararǵa ózgerister engizý týraly» jobasy birinshi oqylymda qatysqan depýtattardyń basym daýsymen qabyldandy.
Osyǵan baılanysty depýtat Pýrevjavyn Saınzorıg qaralyp jatqan qujat qabyldanǵannan keıin mal ósiretin sharýalar men kásiporyndarǵa qandaı múmkindikter ashylatyny jóninde túsinikteme berýdi surady.
Azyq-túlik, aýyl sharýashylyǵy jáne jeńil ónerkásip mınıstri Mıagmarsýrengıın Badamsýren qarar qabyldanǵan soń Úkimetke tıisti ókilettikter beriletinin atap ótip, Batys aımaqta ornalasqan bes shekara beketi arqyly bıdaı unyn, mal azyǵyn jáne jemdik qospalardy kedendik tólemsiz (bajsyz) ımporttaýǵa múmkindik beriletinin habarlady.
Qarar 2026 jyldyń 15 sáýirine deıin kúshinde bolady. Bul sheshim aýyl sharýashylyǵy salasyndaǵy qazirgi jaǵdaıdy eskere otyryp qabyldanǵan jáne bıdaı unynyń úzdiksiz jetkizilýin, onyń qoryn tolyqtyrýdy, sondaı-aq qolaısyz tabıǵı-klımattyq jaǵdaılar saldarynan týyndaýy múmkin mal azyǵy tapshylyǵynyń aldyn alýdy maqsat etedi.
Osylaısha, Mońǵolııa Úkimeti bul qarardyń is júzinde oryndalýyn qamtamasyz etýge jaýapty jáne qajetti ókilettikterge ıe bolyp otyr.
Qarardy júzege asyrý negizgi azyq-túlik ónimderiniń turaqty qoryn qalyptastyrýǵa, mal azyǵy tapshylyǵynyń aldyn alýǵa jáne halyq pen aýyl sharýashylyǵy kásiporyndaryna qoldaý kórsetýge yqpal etedi dep kútiledi.
Osydan buryn Májilis Qazaqstan men Mońǵolııanyń zeınetaqy yntymaqtastyǵy jónindegi qujatty qabyldaǵanyn jazǵanbyz.