Mońǵolııa týrızmdi qalpyna keltirý qarqyny boıynsha álemniń TOP-20 eline endi

ASTANA. KAZINFORM — Mońǵolııa 2025 jylǵy qarasha aıyndaǵy BUU-nyń Dúnıejúzilik týrıstik uıymy (UN Tourism) aı saıyn jarııalaıtyn World Tourism Barometer esebine sáıkes, týrızmdi qalpyna keltirý qarqyny boıynsha álemdegi úzdik 20 eldiń qataryna kirdi, dep jazady Montsame.

Esepke sáıkes, 2025 jyldyń alǵashqy toǵyz aıynda Mońǵolııaǵa barǵan sheteldik týrıster sany 2024 jyldyń osy kezeńimen salystyrǵanda 16 paıyzǵa artqan. Bul kórsetkish óńirlik ortasha deńgeıden eki eseden astam joǵary.

Sonymen qatar, sheteldik týrıster sanynyń pandemııaǵa deıingi 2019 jylmen salystyrǵanda 44 paıyzǵa ósýi eldiń týrıstik sektory álemdegi eń jyldam qalpyna kelip jatqan salalardyń biri ekenin kórsetedi.

Týrızmniń damýyna birqatar júıeli sharalar serpin bergen. Atap aıtqanda, 2023–2025 jyldardyń «Mońǵolııaǵa kelý jyldary» dep jarııalanýy, vızalyq rejımniń jeńildetilýi, áýe reısteriniń kóbeıýi jáne basqa da bastamalar salanyń jedel damýyna yqpal etti.

Aıta keteıik, TOP-20 reıtınginde úzdik úshtikke Vanýatý, Brazılııa, Býtan elderi engen. Sondaı-aq, tizimde Angola, Izraıl, Palaý, Lıvan, Vetnam, Mysyr, Efıopııa, Japonııa, Ońtústik Afrıka, Shrı-Lanka, Koreıa, Fınlıandııa, Marokko, Norvegııa, Kıýrasao, Domınıkan Respýblıkasy tárizdi elder bar.

Buǵan deıin 2025 jyly Mońǵolııaǵa 850 myńnan astam týrıst barǵanyn jazǵanbyz.