Mońǵolııa Syrtqy ister mınıstriniń Qazaqstanǵa alǵashqy resmı sapary ótti
NUR-SULTAN. QazAqparat – Qazaqstan-Mońǵolııa qatynastary tarıhynda alǵashqy ret Mońǵolııa Syrtqy ister mınıstri Batmýnhıın Battsetsegtiń Qazaqstan Respýblıkasyna resmı sapary ótti.
Mońǵolııa mınıstriniń atalmysh sapar Azııadaǵy ózara is-qımyl jáne senim sharalary keńesine (AÓSShK) múshe memleketterdiń Syrtqy ister mınıstrleri keńesiniń 6-shy otyrysyna qatysý sheńberinde ótti, dep habarlaıdy QazAqparat QR Syrtqy ister mınıstrliginiń baspasóz qyzmetine silteme jasap.
Sapar barysynda Mońǵolııa syrtqy saıası vedomstvosynyń basshysy Qazaqstan Respýblıkasynyń Prezıdenti Qasym-Jomart Toqaevpen, Qazaqstan Respýblıkasynyń Premer-Mınıstri Asqar Mamınmen, QR Syrtqy ister mınıstriniń mindetin atqarýshysy Aqan Rahmetýlınmen, sondaı-aq basqa da memlekettik mekemeler jáne uıymdardyń basshylarymen kezdesti.
Atalǵan kezdesýlerdiń barysynda ekijaqty saıası, saýda-ekonomıkalyq jáne mádenı-gýmanıtarlyq yntymaqtastyq, sondaı-aq taraptardyń BUU, AÓSShK, ShYU jáne basqa da óńirlik jáne halyqaralyq uıymdar sheńberindegi yqpaldastyǵy talqylandy.
SІM-degi kezdesýde taraptar bıylǵy Qazaqstan men Mońǵolııa arasyndaǵy taýar aınalymynyń oń dınamıkasy atalyp ótti, saýda-ekonomıkalyq jáne ǵylymı-tehnıkalyq yntymaqtastyq jónindegi úkimetaralyq komıssııasynyń jumysyn kúsheıtýge nıet bildirdi. Sonymen qatar, eki el arasyndaǵy mádenı-gýmanıtarlyq baılanystardyń jáne ǵylymı baǵdarlamalardyń mańyzdylyǵy atap ótildi.
Óz kezeginde, B. Battsetseeg mońǵol tarapynyń aýyl sharýashylyǵy jáne taý-ken ónerkásibi salalaryndaǵy birlesken is-qımyldy keńeıtýge daıyndyǵyn bildirdi. Taraptar Mońǵolııadaǵy qazaq dıasporasy ekijaqty yntymaqtastyqtyń damýyna oń serpin tıgizetin «jandy kópir» bolyp tabylatynyn atap ótti.
Sapar barysynda eki eldiń syrtqy saıası vedomstvolary arasynda 2021-2024 jyldarǵa arnalǵan yntymaqtastyq baǵdarlamasyna qol qoıyldy.
