Mońǵolııa Sıdneı qalasynda Bas konsýldyq ashýdy josparlap otyr

ASTANA. KAZINFORM — Aýstralııada 24 650-den astam Mońǵolııa azamaty turady, dep habarlaıdy Montsame.

Jaqynda ótken Úkimet otyrysynda Aýstralııa Odaǵy aýmaǵynda turatyn mońǵol azamattarynyń quqyqtaryn qorǵaý jáne konsýldyq qyzmetterge qoljetimdiligin arttyrý maqsatynda Sıdneıde Mońǵolııanyń Bas konsýldyǵyn ashý bastamasyn qarastyrý jáne qoldaý týraly sheshim qabyldandy. 

Sonymen qatar, parlamenttiń tıisti turaqty komıtetimen keńes ótkizý kózdelgen.

Aýstralııada 24 650-den astam Mońǵolııa azamaty turyp, eńbek etedi. Bul – sheteldegi mońǵol dıasporalarynyń sany jaǵynan úshinshi orynda.

Osydan buryn habarlanǵandaı, Mońǵolııa azamattary endi AQSh vızasyn alý úshin kepildik tóleýge mindetti.

Sonymen qatar, Mońǵolııa 34 eldiń azamaty úshin vızasyz rejımdi jyl sońyna deıin uzartqany anyqtaldy.