Mońǵolııa saıası náýbet qurbandarynyń otbasylaryna ótemaqy tóleıdi
BAıAN-ÓLGEI. QazAqparat - Mońǵolııa Parlamenti byltyrǵy kóktemgi sessııasynda 1938 jylǵy saıası náýbet qurbandaryn aqtaý, olarǵa ótemaqy, qun tóleý týraly zańnamaǵa qosymsha ózgeris engizip, bekitken bolatyn. Osyǵan baılanysty ótemaqy 2019 jyldan bastap tólene bastaıdy, dep habarlaıdy QazAqparat tilshisi.
Mońǵolııa alǵash ret 1998 jyly zań qabyldap, saıası náýbet qurbandaryn aqtap, olardyń otbasylaryna ótemaqy tóleı bastady. Zań kúshine engen sátten bastap aqtaý, shaǵym, ótinish jasaý merzimi úsh ret, talap qoıý quqyǵy, talqylaý merzimi tórt ret uzartylǵan bolatyn. Al eń sońǵy uzartylǵan merzim 2011 jyldyń 30 jeltoqsanynda aıaqtalyp, qaıtadan ótinish qabyldaıtyn quqyqtyq orta bolmaǵan edi. Sodan beri attaı alty jyl ótti. Osyǵan baılanysty ýaqyt merzimin qaıtadan sozyp, zańǵa túzetýler engizý jaıly zań jobasyn Parlament tóraǵasynyń orynbasary ıA.Sanjmıatav, depýtattar D.Sarangerel, N.Enhbolddar 2017 jylǵy 7 qyrkúıekte Parlamentke usynǵan edi.
Nátıjesinde 2011 jyldan beri birneshe ret usynylǵanymen qoldaý tappaǵan atalmysh zań jobasy Parlamentte talqylanyp, 2018 jyldyń 12 qańtarynda túpkilikti qabyldandy. Zańǵa engizilgen túzetýlerge baılanysty, náýbet qurbandaryn aqtaý jáne shaǵymdaný merzimi 2 jylǵa jalǵasyp 2020 jyldyń 31 jeltoqsanyna deıin qabyldanady. Al ótemaqy qarajaty 2018 jyldyń memlekettik bıýdjetine enbegendikten 2019 jyldan bastap berilmek.
Esterińizge sala keteıik, búginde Mońǵolııada jala jabylyp, jalǵan saıası istermen qýǵyndalǵan, ólim jazasyna kesilgen nemese bas bostandyǵynan aıyrylyp sottalǵan jábirlenýshilerdiń týǵan balalarynyń sany 400-ge jýyq degen aqparat bar. Sondaı-aq, burynǵy zańda náýbet qurbandarynyń urpaqtary, aǵaıyndary men nemerelerine ótemaqy berilip kelse, bul joly zańdy jubaıyna, týǵan jáne asyrap alǵan balasyna, qaıtys bolǵannan keıingi 10 aı ishinde týǵan balasynyń qaısy birine beriledi. Egerde bul adamdar buǵan deıin baspana nemese aqshalaı ótemaqyny qandaı da bir memlekettik mekemeden alǵan bolsa, bul zańǵa qamtylmaıdy. Zań boıynsha qýǵyndalǵan tulǵa ólim jazasyna kesilgen bolsa onyń zańdy týysyna 80 mıllıon tógróg (34 myń AQSh dollar), bas bostandyǵynan aıyrǵan bolsa 40 mıllıon tógrógtiń (17 myń AQSh dollar) ótemaqysy beriledi.
