Mońǵolııa professory pavlodarlyq stýdentterge dáris oqıdy

BAıAN-ÓLGEI. QazAqparat - Mońǵolııanyń Qobda ýnıversıtetiniń Baıan-Ólgeı aımaǵyndaǵy bólimshesiniń ustazy, professor Qınalǵan Jylqyaıdarqyzy Pavlodar memlekettik pedagogıkalyq ýnıversıtetiniń stýdentterine dáris berýde, dep habarlaıdy QazAqparat tilshisi.

Qınalǵan Jylqyaıdarqyzyn Pavlodar memlekettik ýnıversıtetine kafedra meńgerýshisi professor Altynbek Nuquly dáris berýge shaqyrtqan.

Tájirıbeli professor 16-27 sáýir aralyǵynda «Qazaq-Mońǵol tilderiniń salystyrmaly gramatıkasy» taqyrybynda qazaq tili men ádebıet páni boıynsha bilim alyp jatqan stýdentterge 44 saǵattyq lektsııa oqıdy. Aıta keterligi, Pavlodar memlekettik pedagogıkalyq  ýnıversıteti men Qobda ýnıversıtetiniń Baıan-Ólgeı aımaǵyndaǵy bólimshesi 2017 jyly ózara yntymaqtastyq týraly memorandýmǵa qol qoıǵan bolatyn.

Atalmysh qujatta, muǵalimder men stýdentter almasý, birlesken zertteý jumystary jáne birlesken is-sharalardy uıymdastyrý sekildi máseleler engen bolatyn.  Kelesi kezekte Qazaqstan Respýblıkasynyń ustazdary Baıan-Ólgeı aımaǵyndaǵy Qobda ýnıversıtetiniń fılıalynyń stýdentterine dáris oqıdy.