Mońǵolııa Prezıdentiniń ákimshiligi Naýryz aıtysy men jyr múshəırasyn ótkizýge qoldaý bildirdi

BAıAN-ÓLGEI. QazAqparat - Mońǵolııa Prezıdenti ákimshiliginiń bastamasymen qazaq halqynyń dástúrli Naýryz meıramyna oraı naýryz aıynyń 20-22 kúnderi Baıan-Ólgeı aımaǵynda «Altaıdyń úsh bıigi - Aqyt, Baast, Aqtan» atty aıtys jáne jyr músháırasy uıymdastyrylady. Altaıdyń úsh bıigi atanǵandar: Aqyt qajy Úlimjiuly - ataqty qazaq aqyny, dinı qaıratkeri, halyq aǵartýshysy; Bóhıın Baast - Mońǵoldyń halyq jazýshysy, Baıan-Ólgeı aımaǵynyń týmasy; Aqtan Babıuly - MHR mádenıeti men ónerine eńbegi sińgen qaıratker, aqyn ári dramatýrg, dep habarlaıdy «QazAqparat» HAA tilshisi.

Músháıra talaptaryna sáıkes, qatysýshylar saıysy úsh kezeń boıynsha ótkiziledi. Jazba aqyndardyń jas shamasy 18-65 aralyǵyndaǵy bolýy qajet. Birinshi kezeńde «Otan» taqyrybynda jazylǵan bir óleńdi mońǵol, qazaq tilinde jazyp aldyn ala uıymdastyrýshylarǵa tabystaıdy. Týyndylardy tóreshiler baǵalaıdy. Odan, ekinshi kezeńge ótken aqyndar óleńderin oqıdy. Eń sońynda, sońǵy kezeńge joldama alǵan 15 aqyn óleńderin oqyp beredi.

Sondaı-aq  Qazaqstannan, Reseı Federatsııasynan jáne Qytaı Halyq Respýblıkasynyń Shyńjań ólkesiniń aqyndary qatysatyn «Aıtys-shoý» ótedi.

«Altaıdyń úsh bıigi - Aqyt, Baast, Aqtan» - poezııalyq jarysqa, Mońǵol eliniń mádenıetine eńbek sińirgen qaıratkeri, Mońǵolııa jazýshylar odaǵynyń basqarma múshesi Arlaany Erdene-Ochır, Mońǵol eline eńbek sińirgen qaıratker, Mońǵolııa jazýshylar odaǵynyń Baıan-Ólgeı aımaǵyndaǵy bólimshesiniń tóraǵasy, aqyn Suraǵan Rahmetuly, «Shuǵyla» jýrnalynyń jaýapty hatshysy Erkinbek Bódenuly, Aqtan Babıuly atyndaǵy Baıan-ólgeı aımaqtyq Buqaralyq kitaphanasynyń dırektory Asqar Shaımardanuly jáne basqalary tórelik etedi. 

Aqyndar saıysynyń maqsaty, Mońǵol halqynyń ana tiliniń tutastyǵyn qamtamasyz etý, etnıkalyq toptardyń mádenıetin damytý, ana tilin damytyp jáne jazbasha mádenıetti qalyptastyrýshy talanttardy anyqtap, yntalandyrý bolyp tabylady.

Qýat Ýathan