Mońǵolııa prezıdenti óz ómirin saqtap qalǵan erli-zaıyptylardy qonaqqa shaqyrdy
ASTANA. QazAqparat - Mońǵolııa prezıdenti Haltmaagıın Battýlga 28 jyl buryn óziniń ómirin ajaldan aman alyp qalǵan erli-zaıyptylardy óz eline qonaqqa shaqyrdy, dep habarlaıdy QazAqparat Montsame agenttigine silteme jasap.
Mońǵolııanyń Germanııa Federatıvti Respýblıkasyndaǵy Tótenshe jáne ókiletti elshisi D.Ganbat nemistiń Magdebýrg qalasynyń turǵyndary Peter men Brıgıtta Grıelderge mońǵol eliniń basshysy H.Battýlganyń sálemi men alǵysyn jetkizdi.
Osyǵan oraı Grıelder otbasy úılerine kireberis jerge Mońǵolııanyń týyn ilip qoıǵan.
Erli-zaıyptylar Magdebýrg qalasynda H.Battýlga men onyń dosy E.Vanchınsýrenniń ómirin neonatsıstterdiń shabýylynan saqtap qalǵan. Oqıǵa 1990 jyly bolǵan.
Erli-zaıyptylar uzaq ýaqyt ótkenine qaramastan, búgingi Mońǵolııa prezıdenti H.Battýlganyń olardyń kómegin umytpaǵanyna dán rıza ekendikterin jetkizdi.
Elshi D.Ganbat olarǵa syı-sııapattar men prezıdenttiń bıylǵy jyly Mońǵolııaǵa saparlaý týraly shaqyrýyn tabys etti. Peter men Brıgıtta Grıelder bıyl 76 jasqa tolady.
