Mońǵolııa Prezıdenti: Sý resýrstaryna qatysty Qazaqstan bastamalaryn qoldaımyz
ASTANA. KAZINFORM – Sý resýrstaryn qorǵaý men tıimdi paıdalanýda Qazaqstan kóshbasshylyq tanytty. Bul týraly elordadaǵy Óńirlik ekologııalyq sammıtte Mońǵolııa Prezıdenti Ýhnaagıın Hýrelsýh málim etti.
- Birqatar elde aýyz sýdyń tapshylyǵy máselesi bolýy múmkin. Sondyqtan bul baǵytta birlesken is-sharalar mańyzdy. Klımattyń ózgerýine qatysty teris saldardy azaıtý, taýly aımaqtardaǵy ekojúıeni qorǵaý, bıoalýantúrlilikti saqtaý, tabıǵı apattar táýekelin azaıtý bizdiń óńir úshin mańyzdy taqyryp. Bul turǵyda jahandyq ekologııalyq teńgerimdi saqtaýǵa erekshe nazar aýdarǵan jón. Osy oraıda BUU Bas Assambleıasynyń sessııasynda osy baǵyttar boıynsha qabyldanǵan bastamalardy qoldaımyz, - dedi Ýhnaagıın Hýrelsýh.
Onyń aıtýynsha, ekologııa men tabıǵatty qorǵaýǵa qatysty óńirlik bastamalar erekshe mańyzda. Sebebi bul qadamdar ornyqty damý maqsattaryna jetýge eleýli úles qosyp keledi.
- Keıingi jyldary klımattyń ózgerýi saldarynan sý resýrstaryna qol jetkizý men olardy turaqty basqarý máselesi tek Ortalyq Azııada ǵana emes, sonymen qatar barsha álemde ózekti. Bul turǵyda sý resýrstaryn qorǵaý men tıimdi paıdalanýda kóshbasshylyq tanytqan Qazaqstan memleketine alǵysymyzdy aıtamyz. Munymen qosa, Qazaqstan álemdik qoǵamdastyqtyń nazaryn aýdara otyryp, sý resýrstaryn basqarý baǵytynda halyqaralyq yntymaqtystyqta eleýli nátıjeni kórsetti, - dedi ol
Budan bólek, Mońǵolııa Prezıdenti Qazaqstan Prezıdenti Qasym-Jomart Toqaevtyń BUU quramynda Halyqaralyq sý uıymyn qurý usynysyn qoldaıtynyn atap ótti.
- Mońǵolııa osy bastamalardy ilgeriletýge belsendi qatysady, - dep naqtylady Ýhnaagıın Hýrelsýh.
Budan buryn habarlanǵandaı, búgin elordada Memleket basshysy Qasym-Jomart Toqaevtyń qatysýymen «Ornyqty bolashaqqa ortaq kózqaras» taqyrybymen Óńirlik ekologııalyq sammıt (ÓES) jumysyn bastady.
