Mońǵolııa Prezıdenti ShYU sammıtine qatysý úshin Astanaǵa ushyp keldi
ASTANA. KAZINFORM – Ýhnaagıına Hýrelsýhany elordalyq áýejaıda Qazaqstan Premer-Mınıstriniń orynbasary Ǵalymjan Qoıshybaev qarsy aldy.
Mońǵolııa Prezıdenti 3-4 shildede Astanada ótetin ShYU sammıtine qatysady.
Mońǵolııa – 2004 jyly Shanhaı yntymaqtastyq uıymynda baqylaýshy mártebesin alǵan alǵashqy memleket. Sol kezde birlestik geografııalyq turǵyda keńeıe tústi, bul ShYU-nyń halyqaralyq bedeliniń artýyna dálel boldy.
Qazaqstan-Mońǵol yntymaqtastyǵy aıasynda dástúrli dostyq saıası qatynastardan basqa, saýda-ekonomıka salasyndaǵy ózara is-qımyl ekijaqty yntymaqtastyqtyń berik negizi ekenin atap ótken jón. 2023 jyldyń qorytyndysy boıynsha ekijaqty taýar aınalymy $133 mln qurady, bul 2022 jylmen salystyrǵanda 27,7%-ǵa ósim kórsetti.
Eske sala keteıik, buǵan deıin Birikken Ulttar Uıymynyń Bas hatshysy Antonıo Gýtterısh Qazaqstanǵa keldi. Sondaı-aq Reseı Federatsııasynyń Prezıdenti Vladımır Pýtın ShYU sammıtine qatysý úshin Astanaǵa kelgen bolatyn.
