Mońǵolııa prezıdenti Parlament qaýlysyna veto qoıdy

ASTANA. KAZINFORM — Mońǵolııa prezıdenti Ýhnaagıın Hýrelsýh Uly Memlekettik Hýraldyń (Parlamenttiń) «Altyn–3» ulttyq naýqanyn iske asyrý týraly qaýlysynyń bir bóligin keri qaıtardy, dep habarlaıdy Montsame.

Óz ókilettigi aıasynda prezıdent Ýhnaagıın Hýrelsýh bul qaýlyǵa qatysty Mońǵolııa Konstıtýtsııasynda bekitilgen veto qoıý quqyǵyn paıdalandy. Atalǵan qaýly 2025 jyldyń kóktemgi sessııasynda Parlamentte qaralyp, maquldanǵan bolatyn.

Vetonyń negizgi eki sebebi ataldy: birinshisi — erekshe qorǵalatyn tabıǵı aýmaqtardy keńeıtý jónindegi memlekettik saıasatty eskerý qajettigi, ekinshisi — qaýlynyń Konstıtýtsııa qaǵıdattaryna sáıkes kelmeýi.

Aıta keteıik, «Altyn–3» ulttyq naýqany eldiń altyn-valıýta rezervterin arttyrý, tólem balansyna jáne tógróg baǵamyna túsetin qysymdy azaıtý, sondaı-aq makroekonomıkalyq turaqtylyqty qamtamasyz etý maqsatynda Úkimettiń bastamasymen qolǵa alynǵan. 

Mońǵolııanyń ónerkásip jáne paıdaly qazbalar mınıstri Gongoryn Damdınnıam Mınıstrler kabınetiniń kezekti otyrysynda qabyldanǵan sheshimderdi tanystyra otyryp, bylaı dedi:

— Geosaıası jaǵdaıdyń ýshyǵýy, halyqaralyq naryqtaǵy munaı baǵasynyń qubylmalylyǵy jáne bolashaqtyń belgisizdigi aıasynda tómendegi mindetter qoıyldy:

• ımporttaýshy kompanııalarmen birlesip, munaı ónimderiniń qoryn ulǵaıtý úshin tapsyrystar men satyp alýlardy barynsha arttyrý jumystaryn uıymdastyrý;

• munaı ónimderi qoryn arttyrýdy jeńildetilgen nesıeler arqyly qarjylandyrý máseleleri boıynsha Ortalyq bankpen birlesken sharalardy saralap, usynys daıyndaý;

• memlekettik munaı ónimderi qoımasyn salý jónindegi buryn bastalǵan jumystardy jalǵastyrý.

Buǵan deıin Mońǵolııada qoljetimdi baspana úshin arnaıy bank qurylatyny belgili boldy.