Mońǵolııa Prezıdenti otstavkaǵa ketetinin málimdedi
ASTANA. KAZINFORM — Mońǵolııa Prezıdenti Ýhnaagıın Hýrelsýh búgin málimdeme jasap, memleket basshysy qyzmetinen ketýge jáne óziniń abyroıly esimin qalpyna keltirýge nıetti ekenin jetkizdi, dep habarlaıdy Montsame agenttigi.
Onyń aıtýynsha, sońǵy bir aıda ózin qylmystyq toptardyń ókili dep ataǵan adamdar onyń aty men mártebesine birneshe ret nuqsan keltirýge tyrysqan. Mundaı áreketter Prezıdenttiń bedeline ǵana emes, Mońǵolııanyń halyqaralyq ımıdjine de zııan keltiredi.
— Mońǵolııa Prezıdentiniń ar-namysy men qadir-qasıetine qol suǵý – búkil mońǵol halqynyń abyroıyna, sondaı-aq eldiń halyqaralyq baılanystary men yntymaqtastyǵyna nuqsan keltirý. Prezıdenttiń bedeli memlekettiń halyqaralyq ımıdjimen tikeleı baılanysty, — dedi Hýrelsýh.
Ol ózine asa aýyr qylmystarǵa qatysy bar degen aıyp taǵylyp jatqanyn aıtyp, mundaı málimdemelerdiń shyndyqqa janaspaıtynyn jetkizdi. Sondaı-aq Prezıdent laýazymyna baılanysty ınternette jarııalanǵan árbir aqparatqa jaýap bere almaıtynyn, sondyqtan óz ustanymyn resmı túrde bildirýdi jón kórgenin aıtty.
RBK dereginshe, bul aıyptaýlar Tavan-Tolgoı — Gashýýnsýhaıt temirjolynyń qurylysyna qatysty qupııa tender kezinde birqatar saıasatkerdiń jalpy somasy 110 mln dollar para aldy degen kúdikke baılanysty.
Ýhnaagıın Hýrelsýhtiń aıtýynsha, keshe Mońǵolııa Demokratııalyq partııasynyń parlamenttik fraktsııasy otyrys ótkizip, Prezıdentti qyzmetinen ketip, shyndyqtyń anyqtalýyna jol ashýǵa shaqyrǵan. Ol bul talappen kelisetinin málimdedi.
— Meniń atymdy qaralaǵan adamdardy tıisti organdarǵa tapsyryp, óz bedelimdi qalpyna keltirýge kúsh salamyn, — dedi ol.
Buǵan qosa Ýhnaagıın Hýrelsýh memleket basshysy qyzmetin atqarǵan kezeńde memlekettik saıasatta qatelikke jol bermegenin, eshqashan ótirik aıtpaǵanyn, memleket qarjysyn jymqyrmaǵanyn jáne halyqty aldamaǵanyn atap ótti.
Onyń aıtýynsha, ol árdaıym antyna adal bolyp, el ıgiligi úshin eńbek etken. Buǵan dálel retinde «Erdenet», «Mongolrostsvetmet» kásiporyndaryn, Baganýýr jáne Bor-Óndór shahtalaryn, Salhıt, Harmagtaı jáne Noen ýýl ken oryndaryn memleket menshigine qaıtarǵanyn atady. Osylaısha, Ulttyq baılyq qoryn qurýǵa negiz qalanǵan.
Buǵan deıin otstavkaǵa ketpek bolǵan Paragvaı prezıdentine ımpıchment jarııalanatyny habarlanǵan bolatyn.