Mońǵolııa prezıdenti Qazaqstannyń Syrtqy ister mınıstrin qabyldady
ULANBATYR. KAZINFORM – QR Premer-mınıstriniń orynbasary – Syrtqy ister mınıstri Murat Nurtileý Mońǵolııa prezıdenti Ýhnaagıın Hýrelsýhtyń qabyldaýynda boldy. Elimizdiń Syrtqy ister mınıstri 19 jylda alǵash ret Mońǵolııaǵa resmı saparmen bardy.
Kezdesý barysynda M.Nurtileý Qazaqstan Prezıdenti Qasym-Jomart Toqaevtyń shynaıy tilekteri men ystyq sálemin jetkizdi. Óz kezeginde Mońǵolııa Prezıdenti Astananyń Ulanbatyr úshin mańyzdy strategııalyq seriktes ekenin atap ótip, saıası dıalogty odan ári nyǵaıtýǵa múddeli ekenin bildirdi.
M.Nurtileý Mońǵolııa Qazaqstanmen ortaq tarıhı tamyrlarmen, sondaı-aq rýhanı jáne mádenı jaqyndyqpen baılanysty senimdi ári jaqyn kórshi ekenin málimdedi.
Taraptar bıik jáne joǵary deńgeıdegi, sonyń ishinde úkimettik jáne parlamentaralyq saparlarmen almasý jóninde ýaǵdalasty. Saıası, saýda-ekonomıkalyq jáne mádenı-gýmanıtarlyq salalardaǵy yntymaqtastyqtyń jaı-kúıi men damý perspektıvalary, halyqaralyq qurylymdar aıasyndaǵy birlesken jumys talqylanǵan.
Sonymen birge, búgin Qazaqstan SІM basshysy Mońǵolııa Premer-mınıstri Gombojavyn Zandanshatarmen de jeke kezdesý ótkizdi. Qazaqstan men Mońǵolııa ekijaqty taýar aınalymyn 500 mln AQSh dollaryna deıin jetkizýdi kózdep otyr, bul maqsatqa qazaqstandyq astyq pen basqa da aýyl sharýashylyǵy ónimderin jetkizýdi ulǵaıtý arqyly qol jetkizilmek.
Sondaı-aq taý-ken ónerkásibi men mashına jasaý salalaryndaǵy yntymaqtastyq perspektıvalary qozǵaldy. Qazaqstan birlesken geologııalyq barlaý jumystaryn júrgizýge jáne joǵary tehnologııalyq ónim jetkizýge qyzyǵýshylyq bildirdi. Mádenı-gýmanıtarlyq salada mınıstr birlesken jobalardy odan ári ulǵaıtýǵa qazaq tarapynyń ázir ekenin bildirdi.
Aıta keteıik, keler jyly Mońǵolııa prezıdenti Ýhnaagıın Hýrelsýh Qazaqstanǵa saparmen keledi.
Qazaqstan men Mońǵolııanyń Syrtqy ister mınıstrleri kólik-logıstıka salasyndaǵy kedergiler men qıyndyqtardy joıý, jańa kólik baǵyttaryn qurý, áýe reısteriniń sanyn arttyrý, azamattar arasyndaǵy ózara sapar aǵynyn kóbeıtý, ımport pen eksport kólemin ulǵaıtý, sondaı-aq kásipkerlerge qolaıly iskerlik orta qalyptastyrý baǵytynda birlesken jumys júrgizýge ýaǵdalasty.
Resmı sapar aıasynda Mońǵolııadaǵy qazaq dıasporasyna 5 myń dana kitap jetkizildi.