Mońǵolııa Prezıdenti «Altyn qyran» ordenimen marapattaldy
ASTANA. KAZINFORM — Mońǵolııa Prezıdenti Ýhnaagıın Hýrelsúh elimizdiń eń joǵary memlekettik nagradasy «Altyn qyran» ordenimen marapattaldy. Bul týraly Aqordada Mońǵolııa Prezıdenti Ýhnaagıın Hýrelsúhpen kelissózderden keıingi birlesken málimdeme barysynda Memleket basshysy Qasym-Jomart Toqaev aıtty.
— Búgin men Mońǵolııa Prezıdenti, qadirli Hýrelsúh myrzany eki memleket arasyndaǵy yntymaqtastyqty nyǵaıtýǵa jáne qazaq-mońǵol san qyrly baılanystaryn ilgeriletýge qosqan eleýli úlesi úshin Qazaqstannyń eń joǵary memlekettik nagradasy «Altyn qyran» ordenimen marapattadym. Bul myzǵymas baýyrlastyǵymyzdyń, halyqtarymyzdyń keleshegi jolyndaǵy ortaq umtylysymyzdyń jarqyn belgisi, - dedi Qasym-Jomart Toqaev.
Prezıdent Mońǵolııa basshysynyń Qazaqstanǵa sapary óte nátıjeli ótip jatqanyn basa aıtty.
— Qazaqstan men Mońǵolııanyń aımaqtyq jáne jahandyq deńgeıdegi kóptegen ózekti másele boıynsha ustanymdary uqsas. Erteń ótetin ekologııalyq sammıt sonyń aıqyn kórinisi. Biz Mońǵolııamen yntymaqtastyqty damytýǵa aıryqsha kóńil bólemiz. Halyqaralyq uıymdar aıasynda biz bir-birimizge únemi qoldaý kórsetip kelemiz. Bul elderimizdiń strategııalyq seriktestikti jáne ózara seniminiń naqty kórinisi ekeni anyq. Men muny joǵary baǵalaımyn, — dedi Memleket basshysy.
Buǵan deıin Qasym-Jomart Toqaev Aqordada Mońǵolııa Prezıdentin qarsy alǵanyn jazǵan edik.