Mońǵolııa premer-mınıstri qyzmetinen bosatyldy

ASTANA. KAZINFORM — 27 naýryzda Mońǵolııanyń Uly memlekettik hýralynyń (parlament) plenarlyq otyrysynda premer-mınıstr Gombojavyn Zandanshatardyń qyzmetinen bosatý týraly ótinishi qaraldy, dep habarlaıdy Montsame.

Otyrys barysynda ol memleket pen halyq múddesin birinshi orynǵa qoıyp, ókilettigin toqtatý týraly sheshim qabyldaǵanyn aıtty.

— Men qyzmetime jabysyp otyrǵan joqpyn. Memleket pen halyq múddesin birinshi orynǵa qoıyp, ókilettigimdi toqtatý týraly sheshim qabyldadym. Bul jaı ǵana qyzmetti tapsyrý emes, saıasatkerlerdiń mańyzdy múddeler jolynda birige bilýiniń úlgisi, — dedi Gombojavyn Zandanshatar.

Depýtattardyń suraqtaryna jaýap berip, túsinikteme jasaǵannan keıin Zandanshatar sońǵy toǵyz aıdaǵy atqarylǵan jumystar boıynsha esep berdi.

Ol óz sózinde 2025 jyly alǵash ret memlekettik shyǵyndar 2,2 trln týgrıkke qysqarǵanyn aıtty.

— Nátıjesinde kómir eksporty 90 mln tonnaǵa jetip, jalpy eksport kólemi 15,8 mlrd AQSh dollaryn quraǵan. Kashemır eksporty 4,7 ese, et eksporty 25,7%-ǵa artqan. Ekonomıkalyq ósim 2,6%-dan 6,8%-ǵa deıin jedeldep, ınflıatsııa 8,3%-dan 6,5%-ǵa tómendegen. Tólem balansy 600 mln dollar tapshylyqtan 1 mlrd dollar profıtsıtke shyqqan. Valıýtalyq rezervter 2,1 mlrd dollarǵa ósip, tarıhı maksımým — 7 mlrd dollarǵa jetken, — dedi Premer-mınıstr.

Daýys berý qorytyndysy boıynsha depýtattardyń 74%-y onyń otstavkasyn qoldady.

Gombojavyn Zandanshatar jańa premer-mınıstr taǵaıyndalǵanǵa deıin ýaqytsha úkimet basshysy mindetin atqarady.

Budan buryn Mońǵolııa Sıdneı qalasynda Bas konsýldyq ashýdy josparlap otyrǵanyn jazǵan bolatynbyz.