Mońǵolııa premer-mınıstri búrkitshi qyz Aısholpanmen kezdesti

ASTANA. QazAqparat - Qyran búrkit baptap, qyrdyń qyzyl túlkisin aýlap, álemge tanymal bolǵan mońǵolııalyq qandasymyz Aısholpan Nurǵaıypqyzyn Mońǵolııa premeri Ýhnaagıın Hýrelsýh (Khurelsukh Ukhnaa) myrza qabyldady, dep habarlaıdy «QazAqparat» HAA.

AQSh kınogerleriniń "Búrkitshi qyz" fılmi arqyly álemge tanymal bolǵan Aısholpan qaryndasymyz Mońǵolııa premerimen bolǵan kezdesýge qazaqtyń ulttyq kıimin kıip barǵan. Atalǵan eldiń premeri Facebook áleýmettik jelisindegi jazbasynda Aısholpan bas keıipker retinde túsirilgen fılm Mońǵol elin álemge tanytqanyn jazdy.

«Álem halqynyń maqtanyshyna aınalǵan búrkitshi qyzdy qabyldap, júzdestim. Búrkitpen saıatshylyq qurý degenimiz kishkentaı qyz turmaq er jigitter úshin de erlik pen batyldyqty talap etetin qıyn sharýa. Al, Aısholpan seksenge jýyq er azamatty shań qaptyryp, búrkitshiler merekesinde alǵa shyqty. Ol týraly jasalǵan derekti fılm álem elderin eleń etkizdi. "Azııa qurlyǵyn jańǵyrtýshy mártebeli tulǵa" degen abyroıly syılyqtyń ıegeri bolyp, Mońǵol eliniń dúnıejúzilik arenada bedelin kóterdi», - dep málimdedi el premeri óz jazbasynda.