Mońǵolııa parlamenti 2026 jylǵy bıýdjetti maquldady

ASTANA. KAZINFORM — Mońǵolııanyń Uly Memlekettik Hýraly 2026 jylǵa arnalǵan bıýdjet týraly Zańdy bekitti, dep habarlaıdy Montsame.

2026 jylǵy bıýdjet Zańyna sáıkes, jalpy teńdestirilgen bıýdjet kiristeri 31,930 trln tógrógti quraıdy, bul JІÓ-niń 31,2%-yna teń.

Jalpy shyǵystar 32,980 trln tógróg, ıaǵnı JІÓ-niń 32,2%-ynyń shamasynda bolsa, al jalpy defıtsıt 1,05 trln tógrógti, ıaǵnı JІÓ-niń 1,0%-yn quraıdy.

2026 jylǵy bıýdjet Zańyna sáıkes negizgi qarajattar:

• Muǵalimderdiń negizgi jalaqysyn kóterýge 518,62 mlrd tógróg bólindi;

• Dárigerler men medıtsınalyq qyzmetkerlerdiń jalaqysyn kóterýge 19,3 mlrd tógróg;

• Zeınetaqyny 8,6%-ǵa arttyrýǵa 145 mlrd tógróg bólindi;

• Múgedekterge arnalǵan zeınetaqylar men bala kútimine arnalǵan járdemaqylar 20%-ǵa artty, bul aı saıynǵy tólemdi 80 myń tógrógke deıin jetkizdi.

Bul túzetýler shyǵystardy 29,3 mlrd tógrógke arttyrady, nátıjesinde jalpy shyǵystar 969,12 mlrd tógrógke jetedi.

Jalpy aǵymdaǵy shyǵystardyń ósýin óteý úshin 2026 jylǵy bıýdjet shyǵystardy ońtaılandyrý sharalaryn qarastyrady, sonyń ishinde aǵymdaǵy shyǵystardy 990,17 mlrd tógrógke, al kapıtaldyq shyǵystardy 361,14 mlrd tógrógke qysqartý.

Atap aıtqanda, jańa jabdyq satyp alýǵa bólingen qarajat 50%-ǵa qysqartylyp, resýrstar basym baǵyttaǵy jol-kólik jáne ınvestıtsııalyq jobalarǵa qaıta baǵyttaldy, bul 2026 jylǵy Mońǵlııanyń damý josparynyń maqsattaryna sáıkes júzege asyryldy.

Sonymen qatar, Uly Memlekettik Hýral 2026 jylǵa arnalǵan Ulttyq ál-aýqat qorynyń, Áleýmettik saqtandyrý qorynyń jáne Medıtsına saqtandyrý qorynyń bıýdjet zańdaryn da maquldady.

Osyǵan deıin Mońǵolııanyń Konstıtýtsııalyq soty premer-mınıstrdi otstavkaǵa jiberý týraly Parlament qaýlysyn Konstıtýtsııaǵa qaıshy dep tanyǵany habarlandy.