Mońǵolııa ózderiniń «MOZO» atty alǵashqy avtokóligin kópshilikke tanystyrady
Avtomobıl «Mongolyn Zon Olon» /MOZO/ nemese «Mońǵol jurtshylyǵy» degen atpen keshikpeı mońǵol halqynyń turmystyq qajettiligine usynylatyn bolady
Sońǵy aqparattarǵa qaraǵanda, kólikter Mońǵolııaǵa jetkizilgen, 2 aqpanda kórmede kópshilikke kórsetiledi dep kútilýde. Kompanııa tarapynan, sol kúni ashyq esik kúni jarııalanyp, aldyn-ala tapsyrys qabyldaýdy josparlap otyr.
Qazirgi tańda MOZO kóligi Mońǵolııanyń qatal klımaty men mońǵol jurtshylyǵynyń qoldanysyna sáıkes kelýi, sapasy men syrtqy beınesiniń tartymdylyǵy, janarmaı shyǵyny men bólshekterdiń sapasyna synaq júrgizilýde.
Eger synaq sátti bolsa, avtomobıl satylymǵa shyǵady. Alǵashqy avtomobıl ortasha ólshemdi, jol talǵamaıdy, baǵasy mońǵoldardyń ómir súrý jaǵdaıy men qarjylyq múmkindigine baılanysty qoljetimdi bolady, dep habarlaıdy Bars Motors kompanııasynyń ókilderi.
Mońǵol halqy avtokólik satyp alýǵa jylyna 500-800 mıllıon dollar jumsaıdy degen derek bar. Aqsha, ádettegideı Japonııa, Koreıa jáne AQSh-qa asyp ketip jatyr. Sondyqtan, avtokólik satyp alýǵa jumsalatyn qarajat aǵymyn saqtaý kúntártibindegi mańyzdy másele bolyp otyr.
«Bars Motors» JShS óziniń birlesken kásipornyna jylyna 25 000 avtomobıl shyǵaratyn múmkindikke ıe. Kelesi jyly 100% elektrmen jumys isteıtin avtomobılder shyǵarmaq. Sonymen qatar, «Bars Motors» Mońǵolııada avtomobıl shyǵaratyn zaýyt ashý úshin zertteý jumystaryn júrgizýde.
Kompanııa dırektory D.Demberel «Zaýyt qurý úshin óte jaqsy mehanık-ınjenerler nemese bilikti kadrlar, zamanaýı quraldar, avtokólik bólshekteri men tehnologııa basty mańyzǵa ıe bolady. QHR-da álemdegi barlyq tehnologııa shoǵyrlanǵan. Sondyqtan biz, bul jerde ınnovatsııaǵa qol jetkizýimiz kerek. Osylaı jasaý arqyly kem degende 200 mln dollardy elimizde qaldyra alamyz» degen túsinikteme berdi.
Qýat Ýathan
