Mońǵolııa Olımpıada oıyndarynyń eń alyp sımvolyn ornatyp, Gınnes kitabyna enbek
MOŃǴOLIıA. QazAqparat - Mońǵolııa Olımpıada oıyndaryn beıneleıtin bes saqınanyń eń alyp nusqasyn ornatyp, Gınnes rekordtar kitabyna enýdi josparlaýda, dep habarlaıdy «QazAqparat» HAA-nyń menshikti tilshisi.
Mońǵolııa astanasy Ýlanbatyr qalasynda eldiń Nysana kózdeý federatsııasy basqarmalarynyń atsalysýymen «360 Qaırat qasıet - Taǵat turaǵy» atty sadaq atý alańy ashyldy. Klassıkalyq sadaq atýdan atalmysh alań memlekettiń qarjylandyrýynsyz, jeke azamattardyń demeýshiligimen salyndy. Jobanyń qurylysyna 222 mln Mońǵolııa tógrógi (31 mln 800 myń teńgege jýyq) jınalǵan. Sondaı-aq alańda jabyq saraı bolady, ony tolyq aıaqtaýǵa 400 mln tógróg (57 mln 143 myń teńge) kóleminde qarjy qajet.
Halyqaralyq standart boıynsha Nysana kózdeý alańyn salý úshin tek kógaldandyrýdyń ózine 930 myńǵa jýyq AQSh dollary, Mońǵol aqshasymen 2 mlrdqa jýyq tógróg jumsalady. Joba jetekshileriniń aıtýynsha, qosalqy nysandarǵa budan da kóp shyǵyn shyǵady.
Sondaı-aq nysannyń aýmaǵynda Olımpıada oıyndaryn beıneleıtin bes saqınanyń alyp nusqasy ornatylýda. Ony Gınnes kitabyna engizý josparlanýda.
«Ulttyq park aýlasynda Shveıtsarııa standartymen salynyp jatqan «360 Qaırat qasıet - Taǵat turaǵy» alańyndaǵy erekshe jasampazdyq isterdiń biri - álemdik birliktiń sımvoly sanalatyn Olımpıada oıyndarynyń bes saqınasynyń eń alyp nusqasyn ornatý. Ony Gennıs rekordtar kitabyna engizý josparda bar», - deıdi joba jetekshisi, Mońǵolııa Nysana kózdeý federatsııasynyń basqarma múshesi Súhbaataryn Erdenebold.
Qazirgi ýaqyttaǵy rekord 2012 jyly Londonda ótken Olımpıada oıyndarynda aǵylshyndar ornatqan saqınalarǵa tıesili. Olardyń eni - 25 metr, bıiktigi - 11,5 metr. Atalmysh sımvoldy aǵylshyndar 2016 jyly Olımpıadany ótkizgen Rıo-de-Janeıro qalasyna syıǵa tartqan edi. Qazir ol Rıo-de-Janeırodaǵy Madurese Gardens saıabaǵynyń kórkin keltirýde. Álemdegi eń iri osy olımpıadalyq saqınany jasaýǵa 317 817 fýnt jumsalǵan.
Mońǵolııanyń Ulttyq saıabaǵynda salynyp jatqan olımpıadalyq saqınalarǵa kelsek, onyń eni 27 metr, bıiktigi 14 metr bolady. Bul keremet joba sportshylardyń yntasyn arttyrýǵa, nysana kózdeý sportymen shuǵyldanýshy jastar men jetkinshekterge jiger berýge jáne týrısterdi tartýǵa baǵyttalǵan.
Aıta keteıik, Mońǵolııadan Nysana kózdeýden alǵashqy álem chempıony 1970 jyly shyqqan. Bul sport túriniń damyǵanyna 58 jyl bolsa da, nysana kózdeý alańynyń joqtyǵy, atalmysh sport túriniń damýyna, onymen aınalysýshylarǵa kedergi keltirýde.
Jasampazdyq isti júzege asyrý úshin álemniń 10 elinde turatyn Mońǵolııa azamattary men jergilikti halyq óz úlesterin qosýda.
