Mońǵolııa naryǵyna Qazaqstan taýarlaryn eksporttaý jeńildedi
ASTANA. KAZINFORM – Búgin Senattyń jalpy otyrysynda «Bir taraptan Eýrazııalyq ekonomıkalyq odaq pen oǵan múshe memleketter jáne ekinshi taraptan Mońǵolııa arasyndaǵy ýaqytsha saýda kelisimin ratıfıkatsııalaý týraly» Zań maquldandy.
Zań 2025 jylǵy 27 maýsymda Mınsk qalasynda qol qoıylǵan kelisimdi ratıfıkatsııalaýǵa baǵyttalǵan. Kelisimniń maqsaty - tarıftik jáne tarıftik emes kedergilerdi azaıtý nemese joıý arqyly taraptar arasyndaǵy taýarlar saýdasyn yryqtandyrý jáne ońaılatý, sondaı-aq ekonomıkalyq ózara is-qımyldy qoldaý.
Senattyń Ekonomıkalyq saıasat, ınnovatsııalyq damý jáne kásipkerlik komıtetiniń málimetine qaraǵanda, Kelisimdi ratıfıkatsııalaý qazaqstandyq eksportty Mońǵolııa naryǵyna ártaraptandyrý úshin qolaıly jaǵdaılar jasaýǵa, óndiristik baılanystardy nyǵaıtýǵa jáne óńirdegi saýda saıasatynyń boljamdylyǵyn qamtamasyz etýge múmkindik beredi.
- Kelisimniń taýarlyq qamtylýyna ár taraptan 367 taýar qalyptasqan. Óz kezeginde Qazaqstannyń eksporttyq múddesi tolyqtaı qamtamasyz etilgen. Mońǵolııa azyq-túlik ónimderi men ónerkásiptik taýarlarǵa ımporttyq kedendik bajdardy alyp tastaıdy. Elimiz úshin ekonomıkalyq tıimdilikterine toqtalsaq, mońǵol tarapynyń tarıftik jeńildikteri respýblıkamyzdyń Mońǵolııaǵa eksportynyń 92 paıyzyn qamtıdy. Nátıjesinde, otandyq bıznes ımporttyq kedendik bajdardy tóleý kezinde únemdeýge qol jetkizedi. Tarıftik qorǵaý deńgeıiniń tómendeýi qazaqstandyq jetkizilimderdi ulǵaıtýǵa qolaıly jaǵdaı jasaı otyryp, olardyń Mońǵolııa naryǵyndaǵy básekege qabilettiligin arttyrady, - dedi senator Álibek Náýtıev.
Onyń aıtýynsha, Qazaqstannan Mońǵolııaǵa jetkiziletin negizgi taýarlar qataryna temeki ónimderi, nan jáne kondıterlik ónimder, kofe men sháı, dárilik zattar, teledıdarlar, monıtorlar men proektorlar jatady.
- Al Qazaqstan Mońǵolııadan jylqy etin, kartop, poshta markalary men ózge de baǵaly qaǵazdardy, aıaq kıim jáne basqa da taýarlardy ımporttaıdy. Sonymen qatar, Kelisimdi ratıfıkatsııalaý aýyl sharýashylyǵy men ónerkásip sektorlarynyń damýyna oń áserin tıgizedi. Eksport úshin qolaıly taýarlardy ótkizý naryqtaryn keńeıtý arqyly otandyq óndiristi ulǵaıtý úshin qosymsha yntalandyrý bolatyny sózsiz. Jalpy, bul Kelisim Eýrazılıaq ekonomıkalyq odaq elderi men Mońǵolııa arasyndaǵy saýda baılanystaryn damytýǵa jáne nyǵaıtýǵa, sondaı-aq Mońǵolııa naryǵyna taýarlardy ilgeriletý úshin qolaıly jaǵdaılar qalyptastyrýǵa baǵyttalady, - dedi depýtat.
Budan buryn habarlanǵandaı, Qazaqstan Mońǵolııamen zeınetaqy salasyndaǵy yntymaqtastyq týraly kelisimdi ratıfıkatsııalady.