Mońǵolııa men Qytaı arasyndaǵy ekinshi temirjoldyń qurylysy bastaldy
ASTANA. KAZINFORM – Mońǵolııa men Qytaı arasyndaǵy ekinshi transshekaralyq temirjol jelisiniń qurylysy 14 mamyrda bastaldy.
Sınhýa agenttiginiń habarlaýynsha, Qytaı men Mońǵolııa arasyndaǵy ekinshi temirjoldyń qazyǵyn qaǵý rásimi sársenbi kúni Іshki Mońǵolııa avtonomııalyq aımaǵynyń Baıannýýr qalasyna qarasty Gantsımodo shekaralyq ótkelinde ótti.
Bul – 1956 jyly Ereenhod – Zamynúúd temirjoly iske qosylǵannan beri, 70 jylǵa taıaý ýaqyttan keıin, Qytaı men Mońǵolııa arasynda salyna bastaǵan ekinshi transshekaralyq temirjol jelisi.
Atalǵan temirjol Qytaıdyń Gantsımodo shekaralyq beketi arqyly Mońǵolııa jerine ótip, ári qaraı eldiń Ońtústik Gobı aımaǵyndaǵy Gashýýnsýhaıt stantsııasyna jetedi. Jobanyń Qytaı aýmaǵyndaǵy bóliginiń qurylysy 2027 jyly aıaqtalady dep josparlanǵan.
Agenttiktiń jazýynsha, bul joba Qytaıdyń Gantsımodo-Tsıýannan temirjoly men Mońǵolııanyń Ońtústik temirjol jelisin ózara tutastyryp, eki el arasyndaǵy ınfraqurylymdyq baılanys pen saýda-ekonomıkalyq áriptestikke serpin beredi.
Sonymen qatar, Qytaı men Mońǵolııa arasyndaǵy transshekaralyq logıstıka men shekara mańy ındýstrııalyq aımaǵynyń jáne shekaralyq saýda qyzmetteriniń damýyna jol ashady.
Buǵan deıin Qytaı – Qyrǵyzstan - Ózbekstan temirjolynyń qurylysy bastalǵanyn habarlaǵan edik.