Mońǵolııa memlekettik úlesi bar kompanııalardyń sanyn qysqartady
ASTANA. KAZINFORM — Mońǵolııanyń Mınıstrler kabıneti memleket qatysatyn kompanııalar sanyn qysqartý týraly sheshim qabyldady, dep habarlaıdy Montsame.
Kezekti otyrysta eldiń Mınıstrler kabıneti memleket qatysatyn kompanııalar sanyn 109-dan 87-ge deıin qysqartý týraly sheshim qabyldady.
2025 jyldyń birinshi jartyjyldyǵynyń basynda 109 memlekettik úlesi bar kompanııa 11 salada — energetıka, jol qurylysy, kólik, taý-ken óndirisi jáne bank isi syndy baǵyttarda jumys istegen. Olardyń 86-sy — bas kompanııalar, qalǵandary enshiles uıymdar.
Parlament pen Úkimettiń memlekettik múlikti jekeshelendirý týraly qaýlylary men tapsyrmalaryn oryndaý deńgeıin eskere otyryp, memlekettik zańdy tulǵalardyń aktsııalaryn satý boıynsha ashyq jarııa aýktsıondar ótkizýdiń ádistemelik usynymdaryn ázirleý tapsyryldy. Sondaı-aq, memlekettik aktsııalardy satý jáne qaıta uıymdastyrý tártibin de osy usynymdar qamtýy tıis. Bul qujattar 15 tamyzǵa deıin usynylýy kerek.
Sonymen qatar, memlekettik organdarǵa memlekettik qyzmetkerlerdiń jumysyn baǵalaý jónindegi esepterdi óz resmı saıttarynda jarııalaý tapsyryldy. Qyzmetkerler «A» (óte jaqsy) jáne «V» (qanaǵattanarlyq) baǵalaryn alǵanyna qaramastan, halyqtyń 60%-dan astamy memlekettik qyzmet sapasyna kóńili tolmaıtynyn bildirgen.
Osyǵan baılanysty Úkimet múshelerine, vedomstvo basshylaryna, ár deńgeıdegi bıýdjettik qarajatty tikeleı basqaratyn tulǵalarǵa, aımaqtar men astanadaǵy memlekettik ákimshilik uıymdardyń basshylaryna, sondaı-aq Uly memlekettik Hýral ákimshiligi men oǵan qarasty uıymdardyń jetekshilerine 2024 jylǵy jáne 2025 jyldyń alǵashqy jartyjyldyǵyna arnalǵan qyzmet nátıjeleri týraly esepterdi 20 tamyzǵa deıin qoǵamdyq qoljetimdi etý jáne veb-saıttarǵa ornalastyrý tapsyryldy.
Budan buryn Mońǵolııa prezıdenti Ýhnaagıın Hýrelsýh Uly Memlekettik Hýraldyń «Altyn–3» ulttyq naýqanyn iske asyrý týraly qaýlysynyń bir bóligin keri qaıtarǵanyn jazǵanbyz.