Mońǵolııa mektepteriniń oqý baǵdarlamasyna shahmat engiziledi
ASTANA. KAZINFORM — Úkimet shahmatty kásibı sport deńgeıinde damytýmen qatar, ony buqaralyq sport túrine aınaldyrýǵa erekshe kóńil bólip, mektepterdiń oqý baǵdarlamasyna engizý baǵytynda jumys júrgizip jatyr, dep habarlaıdy Montsame.
Ulan-Batyrda 2026 jylǵy balalar arasyndaǵy ulttyq shahmat chempıonaty bastaldy. Chempıonatqa 21 aımaq pen astanadan myńǵa jýyq jas shahmatshy qatysyp jatyr. Olardyń qatarynda 50-den astam halyqaralyq sheber, FIDE sheberi jáne sport sheberligine kandıdat bar.
Mońǵolııanyń Premer-mınıstri ári Mońǵolııa shahmat federatsııasynyń prezıdenti Gombojavyn Zandanshatar qatysýshylarǵa joldaý arnady. Onda Halyqaralyq shahmat federatsııasy 2026 jylǵa «Shahmatty bilim berý júıesine engizý» baǵdarlamasyn negizgi maqsat retinde belgilegeni aıtylǵan.
Joldaýda sondaı-aq memleket shahmatty damytý men nasıhattaýdy júıeli túrde qoldaıtyny atap ótildi. Atap aıtqanda, úzdik sportshylardy marapattaý, ulttyq jáne halyqaralyq jarystarǵa qatysýǵa múmkindik berý, sondaı-aq elde bedeldi halyqaralyq týrnırler ótkizý josparlanǵan.
— Shahmatpen aınalysyp, qabiletterin damytyp, Azııa men álemniń úzdik shahmatshylarymen básekege túsip júrgen jas azamattarymyzdy maqtan tutamyn. Sondaı-aq balalardyń osy sport túrine qyzyǵýshylyǵyn arttyrýǵa úles qosyp júrgen ata-analarǵa, muǵalimder men jattyqtyrýshylarǵa alǵys aıtamyn, — delingen joldaýda.
Aıta keteıik, 2025 jyly mońǵolııalyq jas shahmatshylar halyqaralyq týrnırler men mektep oqýshylary arasyndaǵy Azııa chempıonattarynda 30 medal jeńip alǵan.
Osydan buryn Mońǵolııa týrızmdi qalpyna keltirý qarqyny boıynsha álemniń TOP-20 eline engenin jazdyq.