Mońǵolııa Qazaqstannan bıdaı ımporty kólemin arttyrýǵa qyzyǵýshylyq tanytty
ASTANA. KAZINFORM – Mońǵolııa Qazaqstannan bıdaı ımporty kólemin arttyrýǵa qyzyǵýshylyq tanytty. Bul týraly Aqordada Memleket basshysy Qasym-Jomart Toqaevpen keńeıtilgen quramdaǵy kelissóz barysynda Mońǵolııa Prezıdenti Ýhnaagıın Hýrelsúhpen aıtty.
- Mońǵolııa Prezıdenti retinde 20 jyldan keıin Qazaqstanǵa memlekettik saparmen kelý qurmetine ıe bolǵanyma qýanyshtymyn. Delegatsııamyzdy jyly shyraımen jáne qonaqjaılyqpen qarsy alǵanyńyz úshin Qazaqstan Úkimeti men dostas halyqqa shyn júrekten alǵys bildiremin, - dedi Mońǵolııa Prezıdenti.
Mártebeli meıman bul sapary tarıhy ortaq eki halyqtyń dostyǵyn odan ary nyǵaıtyp, eki eldiń yntymaqtastyǵyn keńeıte túserine senim bildirdi.
- Sizdiń bastamańyzben, búkil halyqtyń qoldaýymen ótkizilgen referendým barysynda jańa Konstıtýtsııalaryńyzdyń qabyldanýymen quttyqtaımyn. Bul tarıhı oqıǵa Qazaqstanda demokratııany, zań ústemdigin, adam quqyqtary men bostandyǵyn nyǵaıtyp, ekonomıkalyq damýdyń jedeldeýine berik negiz bolaryna senimdimin. Qazaqstandy jaqyn seriktesimiz, Ortalyq Azııadaǵy myǵym kópir dep sanaımyz. Ekonomıkalyq yntymaqtastyǵymyzdy mal sharýashylyǵy, jeńil ónerkásip, týrızm syndy kóptegen salalada damytýǵa áleýetimiz zor. 2024 jylǵy saparyńyz kezinde 2025-2027 jyldarǵa arnalǵan saýda-ekonomıkalyq yntymaqtastyqty damytý jol kartasy bekitilip, ózara taýar aınalymyn 500 mln dollarǵa jetkizý maqsaty qoıyldy. Qazaqstannan jemis-jıdek, kókónis, bıdaı, sonymen qatar sapaly bıdaı tuqymy kólemin arttyrý úshin yntymaqtastyqty kúsheıtýge múmkindigimiz bar, - dedi Ýhnaagıın Hýrelsúh.
Buǵan deıin Qasym-Jomart Toqaev Aqordada Mońǵolııa Prezıdentin qarsy alǵanyn jazǵan edik.
