Mońǵolııa Qazaqstannan 4 myńǵa jýyq oqýlyqtar men oqý-ádistemelik materıaldar aldy

ASTANA. QazAqparat - QR Premer-Mınıstri Kárim Másimov Memleket basshysy Nursultan Nazarbaevtyń tapsyrmasymen Ólgeı qalasyna bardy, onda jergilikti oqý oryndarynyń jumysymen tanysty, dep habarlaıdy pm.kz.

K. Másimov Baıan-Ólgeı okrýginiń ákimshilik ortalyǵyndaǵy №1 qazaq mektebine bardy.

Baıan-Ólgeı okrýginiń ákimshilik ortalyǵyndaǵy №1 qazaq mektebi 2014 jyly ashylǵan. Sol kezde Qazaqstan Úkimeti bilim mekemesin mektepke qajetti kerek-jaraqtarmen jáne oqý quraldarymen qamtamasyz etken bolatyn. 

Bilim salasyndaǵy ekijaqty yntymaqtastyq Qazaqstan Respýblıkasynyń Bilim jáne ǵylym mınıstrliginiń jáne Mońǵolııanyń Bilim, mádenıet jáne ǵylym mınıstrliginiń arasyndaǵy Kelisim aıasynda júzege asyrylatynyn aıta ketken jón.  

Jyl saıyn QR BǴM shetelde mekendep jatqan qandastarymyzdyń balalary óz halqynyń tarıhyn, mádenıetin jáne tilin oqyp-úırenýi úshin oqý-ádistemelik quraldardy jiberip otyrady. 

Máselen, 2016 jyly Mońǵolııadaǵy qazaq mektebi 7-8 synyptardyń oqýshylary úshin Qazaqstannan 4 myńǵa jýyq oqýlyqtar men oqý-ádistemelik materıaldar aldy.

Sonymen qatar joǵary jáne joǵary bilimnen keıingi bilim salasyndaǵy baılanystar damýda. Atap aıtqanda, bizdiń elimizdiń azamaty bolyp tabylmaıtyn qazaq stýdentterine kvota boıynsha bilim grantyn alý úshin konkýrsqa jáne Qazaqstan azamattarymen teńdeı jalpy konkýrsqa qatysý múmkindigi beriledi. 

Tek 2015 jyldyń ózinde kvotany Mońǵolııadaǵy 44 etnıkalyq qazaq paıdalanyp, bizdiń elimizde bilim alý múmkindigine ıe bolǵan. 2001 jyldan bastap Baıan-Ólgeıde S.Amanjolov atyndaǵy Shyǵys Qazaqstan ýnıversıtetiniń fılıaly ashylǵan. Jyl saıyn Qazaqstannyń bilim mınıstrligi ShQMÝ úshin Mońǵolııa azamattaryna arnap 25 maqsatty grant bóledi.

Eske salaıyq, K.Másimov Mońǵolııaǵa XI ASEM sammıtine qatysý úshin bardy, shara 15 shilde kúni Ulan-Batyr qalasynda ótedi.