Mońǵolııa Qazaqstanda jasalǵan poıyzdardy alatyn boldy

ASTANA. QazAqparat - Búgin «Qazaqstan temir joly» UK» AQ basshysy Qanat Alpysbaev Mońǵolııa astanasy Ulanbatyrda kólik salasyndaǵy seriktestikti damytý týrasynda kezdesýler ótkizdi, dep habarlaıdy kompanııanyń baspasóz qyzmeti.

Mońǵolııa kólik jáne joldy damytý mınıstri Dangaa Ganbatpen bolǵan kezdesýde «QTJ» UK» AQ prezıdenti Qazaqstannyń kólik-logıstıkalyq kesheni salasyn damytýdaǵy jetistikteri men halyqaralyq kólik jelisine kirý maqsatyndaǵy tranzıttik áleýeti týraly baıandady.

Q. Alpysbaev kompanııa júzege asyryp jatqan iri ınfraqurylymdyq jáne temir jol kóligi salasyn damytý jobalary týraly áńgimelep, qazaqstandyq taraptyń monǵol temir jolymen seriktestikti damytýǵa múddeli ekendigin jetkizdi.

«Ulanbatyr temir joly» AQ bastyǵy Damdınsýren Jıgjıdnıamaamen kezdesýde qazaqtandyq taraptyń magıstraldyq teplovozdar, júk vagondary, relster, baǵyttaýysh burmalary jáne basqa da temir jol ónimderin Mońǵolııaǵa jetkizý jaıy qarastyryldy.

Kezdesý sońynda «Qazaqstan temir joly» UK» AQ men «Ulanbatyr temir joly» AQ arasynda temirjol kóligi mashınasyn jasaý salasyndaǵy seriktestikti damytý boıynsha memorandýmǵa qol qoıyldy.