Mońǵolııa qar barysyn saqtaý jónindegi halyqaralyq qor quramyna qosylady

ASTANA. KAZINFORM — 15 qazanda ótken kezekti otyrysynda Mońǵolııa Mınıstrler kabıneti «Mońǵolııanyń Qar barysyn saqtaý jónindegi halyqaralyq qorǵa qosylýyn qoldaý týraly» qaýly jobasyn talqylap, qoldady, dep jazady Montsame.

Atalǵan qorǵa qosylý Mońǵolııaǵa qar barysy men onyń tirshilik etý ortasyn qorǵaýdy kúsheıtýge, sondaı-aq qar barysy mekendeıtin aımaqtarda turatyn malshy qaýymdastyqtarynyń ómir súrý sapasyn jaqsartýǵa múmkindik beredi.

Jeti iri jabaıy mysyq túrin saqtaý maqsatynda Halyqaralyq iri mysyqtar alıansyn (IBCA) qurý bastamasyn alǵash bolyp Úndistan Respýblıkasy kótergen bolatyn. Bul rette Mońǵolııa bul qorǵa qosylýǵa alǵash ret 2023 jyly ótinish bergen.

Sonymen qatar Mońǵolııa Halyqaralyq kún alıansyna qosylatyny anyqtaldy. Mońǵolııa Úkimeti eldiń Halyqaralyq kún alıansyn (MSA) qurý jónindegi Bas kelisimge qosylýyn maquldap, Energetıka mınıstrligin óziniń ókiletti organy retinde taǵaıyndady.

Atalmysh alıans 2015 jyly qurylǵan. Alıanstyń shtab-páteri Úndistannyń Harıana shtatyndaǵy Gýrgaon qalasynda ornalasqan. Halyqaralyq kún alıansy Jańartylatyn energııa kózderi jónindegi halyqaralyq agenttikpen (IRENA) básekelespeıdi, alaıda kún energııasyna baı elderde ortaq máselelerdi sheshetin jobalar men baǵdarlamalarǵa qarjy resýrstaryn jumyldyrýǵa kómek kórsetýge basa nazar aýdarady.

Alıansqa qosylý Mońǵolııaǵa mynadaı artyqshylyqtar beredi:

• Jańartylatyn energııa kózderi salasynda óńirlik yntymaqtastyqty damytý;
• Kún energııasyn paıdalanýǵa qoldaý kórsetý;
• Óndiristi ulǵaıtý;
• Ekologııalyq taza tehnologııalardy engizý;
• Parnıktik gazdar shyǵaryndylaryn azaıtý.

Budan buryn Mońǵolııa memlekettik úlesi bar kompanııalardyń sanyn qysqartatyny aıtyldy.