Mońǵolııa baıqaýshysy Beısen Bulanuly saılaý týraly: Qazaqstan jańaryp jatyr

ASTANA. QazAqparat – Shanhaı Yntymaqtastyq Uıymy atynan halyqaralyq baıqaýshy bolyp kelgen Mońǵolııa Parlamentiniń múshesi Beısen Bulanuly QazAqparat tilshisine depýttar saılaýy qalaı ótip jatqany týraly paıymyn aıtty.

«Birinshiden partııalar tizimderin 70 paıyz jańartypty. 30 paıyzy jastar men áıelderge, múgedektigi bar azamattarǵa berilgen eken. Munyń ózi demokratııa. Ekinshiden, saılaýǵa úmitkerler baǵdarlamasyn, sýretterin kóshe boılaryna ilip qoıypty. Onyń ózi úlken demokratııa. Úshinshiden sybaılastyq joq sııaqty kórindi. Sondyqtan osy jolǵy saılaý jaqsy bola ma dep otyrmyn. Búgin mine qar jaýdy. Bul aq qardy kirshiksizdiktiń, tazalyqtyń belgisi sanap, yrymdadym. Sonymen birge, osy jaýǵan qardaı Qazaqstan jańaryp jatyr ma dep yrymdap otyrmyn», - dedi halyqaralyq baıqaýshy.

Sondaı-aq ol Qazaqstandaǵy reformalardyń oń nátıje bere bastaǵanyn aıtyp, saılaýdan sol kórinisti baıqaǵanyn atap ótedi. Halyqaralyq baıqaýshy saıası partııalarǵa birdeı múmkindik berilip otyrǵanyn alǵa tartady.

«Saılaýǵa jańa partııalar kirip jatyr. ıAǵnı, ár partııanyń áleýeti ár túrli. Biriniń aýdıtorııasy tym aýqymdy bolsa, biri shaǵyn uıym degen sııaqty. Keıde úlken partııalar ústemdik júrgizip, daýys berý protsesin qoldan retteıtin jaǵdaılar bolady. Al endi Qazaqstanda ondaı nárseni baıqamaı turmyz», - dedi Beısen Bulanuly.