Mońǵolııa aýyl sharýashylyǵy salasynda Azııamen birlesken jumysqa jetekshilik etedi

ASTANA. KAZINFORM — Mońǵolııa Azyq-túlik jáne aýyl sharýashylyǵy salasyndaǵy yntymaqtastyq jónindegi Azııa bastamasy tóraǵasynyń orynbasary bolyp taǵaıyndaldy, dep jazady Montsame.

Mońǵolııa úsh jyl merzimge Azyq-túlik jáne aýyl sharýashylyǵy salasyndaǵy yntymaqtastyq jónindegi Azııa bastamasy (AFACI) tóraǵasynyń orynbasary bolyp taǵaıyndaldy. Bul sheshim Nepaldyń Katmandý qalasynda ótken AFACI-diń 7-shi Bas assambleıasynda bastamaǵa múshe elderdiń delegattary tarapynan qabyldandy.

Mońǵolııa atynan qatysqan Azyq-túlik, aýyl sharýashylyǵy jáne jeńil ónerkásip mınıstrliginiń memlekettik hatshysy T.Jambaltseren Mońǵolııanyń Azııadaǵy aýyl sharýashylyǵy salasyndaǵy yntymaqtastyqty odan ári tereńdetýge jáne klımattyń ózgerýine beıimdelgen ǵylymı negizdelgen sheshimderdi birlesip engizýge zor mán beretinin atap ótti.

Ońtústik Koreıa Respýblıkasynyń Aýyldyq aýdandardy damytý basqarmasy uıymdastyrǵan Bas assambleıaǵa AFACI-ge múshe 15 eldiń aýyl sharýashylyǵy salasynyń ókilderi qatysty.

Assambleıa barysynda qatysýshylar qoldanystaǵy jobalar men baǵdarlamalardyń barysy men nátıjelerin qarastyryp, azyq-túlik jáne aýyl sharýashylyǵy salasyndaǵy bolashaq yntymaqtastyq saıasatynyń baǵyttaryn talqylap, aıqyndady.

Osydan buryn Mońǵolııa parlamenti «El premer-mınıstrine senim votýmy týraly» qaýlynyń qabyldanýyn qoldamaǵany málim boldy.